نشاط ملز کا ترک شراکت دار سوتاش کے ساتھ ڈیری منصوبے سے نکلنے کا فیصلہ

نشاط ملز لمیٹڈ (این ایم ایل) نے نشاط سوتاش ڈیری لمیٹڈ (این ایس ڈی ایل) میں اپنے 49.1 فیصد مکمل حصص ترک مشترکہ منصوبے کے شراکت دار سوتاش سوت اورونلری اے ایس کو فروخت کرنے کی منظوری دے دی ہے۔

این ایم ایل نے بدھ کو پاکستان اسٹاک ایکسچینج (پی ایس ایکس) کو جاری کردہ نوٹس میں اس پیش رفت سے آگاہ کیا۔نوٹس میں کہا گیا کہ کمپنی کے بورڈ آف ڈائریکٹرز نے غور و خوض کے بعد ڈیری صنعت کو درپیش موجودہ مارکیٹ اور ضابطہ جاتی حالات اور اس کے نتیجے میں کمپنی کی مالی پوزیشن پر پڑنے والے دباؤ کو مدنظر رکھتے ہوئے یہ طے کیا ہے کہ نشاط سوتاش ڈیری لمیٹڈ میں اپنی سرمایہ کاری سے دستبردار ہونا کمپنی اور اس کے شیئر ہولڈرز کے بہترین مفاد میں ہے۔

نشاط سوتاش ڈیری لمیٹڈ، نشاط ملز لمیٹڈ کی ذیلی کمپنی ہے، جو ترکیہ کی سوتاش سوت اورونلری اے ایس کے ساتھ مشترکہ منصوبے کے طور پر قائم کی گئی تھی۔

نوٹس میں مزید کہا گیا کہ بورڈ نے این ایس ڈی ایل میں کمپنی کی مکمل حصص داری اپنے مشترکہ منصوبے کے شراکت دار سوتاش کو مجوزہ طور پر 5 روپے فی شیئر کے عوض فروخت کرنے کی منظوری دے دی ہے۔ تاہم یہ لین دین کمپنی کے شیئر ہولڈرز کی منظوری اور تمام ضروری قانونی و ضابطہ جاتی تقاضے پورے کرنے سے مشروط ہے، جس میں حتمی معاہدے پر دستخط بھی شامل ہیں۔

نشاط ملز نے بتایا کہ معروف بین الاقوامی ڈیری کمپنی سوتاش نے این ایس ڈی ایل کے حصص حاصل کرنے اور اس کا کاروبار جاری رکھنے پر آمادگی ظاہر کی ہے۔

یہ پیش رفت حتمی لین دین کے معاہدوں پر دستخط اور متعلقہ منظوریوں کی تکمیل سے مشروط ہے۔کمپنی نے مزید کہا کہ یہ لین دین پاکستان کی معیشت میں غیر ملکی سرمایہ کاروں کی مسلسل شرکت کی حوصلہ افزائی کرے گا اور پاکستان کے ڈیری شعبے اور معیشت کے لیے ایک غیر ملکی اسٹریٹجک سرمایہ کار کے مسلسل عزم کا اظہار بھی ہے۔