لاہور چیمبر کا افریقی ممالک سے تجارتی روابط مضبوط بنانے پر زور

تنزانیہ کے لیے نامزد پاکستانی ہائی کمشنر حسنین یوسف نے لاہور چیمبر کے صدر فہیم الرحمن سہگل سے ملاقات کی جس میں پاکستان اور افریقی ممالک کے درمیان تجارتی و اقتصادی تعلقات کے فروغ، برآمدات میں اضافے اور نئی منڈیوں تک رسائی کے امکانات پر تفصیلی گفتگو کی گئی۔

اس موقع پر لاہور چیمبر کے سینئر نائب صدر تنویر احمد، نائب صدر خرم لودھی، ایگزیکٹو کمیٹی کے رکن ندیم انصاری اور دیگر عہدیداران بھی موجود تھے۔

صدر لاہور چیمبر فہیم الرحمن سہگل نے کہا کہ پاکستان کو اپنی برآمدات میں اضافے کے لیے نئی اور ابھرتی ہوئی منڈیوں کی جانب توجہ دینا ہوگی۔

انہوں نے کہا کہ افریقہ ایک وسیع اور تیزی سے ترقی کرتی ہوئی مارکیٹ ہے جہاں پاکستانی مصنوعات، خصوصاً آٹو پارٹس، انجینئرنگ مصنوعات اور دیگر صنعتی شعبوں کے لیے نمایاں مواقع موجود ہیں۔

انہوں نے کہا کہ پاکستانی برآمدات کو درپیش چیلنجز کے پیش نظر نئی منڈیوں کی تلاش وقت کی اہم ضرورت ہے۔ ان کا کہنا تھا کہ پاکستان کے انسانی وسائل کے لیے بھی افریقی ممالک میں وسیع مواقع موجود ہیں، جنہیں بروئے کار لا کر نہ صرف روزگار کے مواقع پیدا کیے جا سکتے ہیں بلکہ ترسیلاتِ زر میں بھی اضافہ کیا جا سکتا ہے۔

فہیم الرحمن سہگل نے نشاندہی کی کہ پاکستان کی تقریباً 60 فیصد ترسیلاتِ زر خلیجی ممالک سے آتی ہیں اور خطے کی بدلتی ہوئی صورتحال کے باعث متبادل منڈیوں اور مواقع کی تلاش ناگزیر ہو چکی ہے۔

انہوں نے کہا کہ افریقہ اور امریکی براعظم کے ممالک اربوں ڈالر کی درآمدات کرتے ہیں اور پاکستان کو ان منڈیوں میں اپنا حصہ بڑھانے کے لیے مؤثر حکمت عملی اختیار کرنی چاہیے۔

انہوں نے نامزد ہائی کمشنر سے درخواست کی کہ وہ پاکستانی برآمدات کے فروغ، کاروباری روابط کے استحکام اور سنگل کنٹری نمائشوں کے انعقاد میں بھرپور تعاون فراہم کریں۔

انہوں نے کہا کہ لاہور چیمبر اس حوالے سے فعال کردار ادا کر رہا ہے اور نجی شعبہ نئی منڈیوں تک رسائی کے لیے ہر ممکن اقدامات کر رہا ہے۔

اس موقع پر نامزد پاکستانی ہائی کمشنر حسنین یوسف نے کہا کہ لاہور چیمبر آف کامرس اینڈ انڈسٹری ملکی معیشت اور کاروباری سرگرمیوں کے فروغ میں اہم کردار ادا کر رہا ہے۔

انہوں نے کہا کہ حکومت پاکستان برآمدات میں اضافے اور نئی منڈیوں کی تلاش کے لیے خصوصی توجہ دے رہی ہے۔

انہوں نے کہا کہ افریقہ ایک ابھرتی ہوئی اور مواقع سے بھرپور مارکیٹ ہے جہاں پاکستانی کاروباری برادری کے لیے وسیع امکانات موجود ہیں۔

انہوں نے یقین دہانی کرائی کہ تنزانیہ سمیت افریقی ممالک میں تجارت، سرمایہ کاری، کاروباری تعاون اور پاکستانی افرادی قوت کے لیے نئے مواقع پیدا کرنے کے سلسلے میں مکمل تعاون فراہم کیا جائے گا۔

حسنین یوسف نے کہا کہ باہمی ٹیم ورک اور مسلسل رابطوں کے ذریعے پاکستان اور افریقی ممالک کے درمیان تجارتی حجم میں نمایاں اضافہ کیا جا سکتا ہے اور وہ لاہور چیمبر اور پاکستانی کاروباری برادری کی ہر ممکن معاونت کریں گے۔