لاہور : کاہنہ میں ٹیوشن سینٹر کی چھت گرگئی، 14 بچے جاں بحق

آج نیوز نے ریسکیو حکام اور اسپتال انتظامیہ کے حوالے سے بتایا ہے کہ لاہور کے علاقے کاہنہ میں ایک ٹیوشن سینٹر کی چھت گرنے سے کم از کم 14 بچے جاں بحق اور متعدد زخمی ہو گئے۔

یہ حادثہ اس وقت پیش آیا جب تقریباً 30 بچے کلاس روم میں موجود تھے کہ اچانک چھت گرنے سے وہ ملبے تلے دب گئے۔ریسکیو 1122 کے مطابق ابتدائی اطلاعات میں 8 سے 10 بچوں کے دبے ہونے کا خدشہ ظاہر کیا گیا تھا، تاہم بعد میں معلوم ہوا کہ حادثے کے وقت ٹیوشن سینٹر کے اندر تقریباً 30 بچے موجود تھے۔

امدادی ٹیموں نے فوری طور پر آپریشن شروع کرتے ہوئے اب تک 15 بچوں کو ملبے سے باہر نکال لیا ہے اور تمام زخمیوں کو علاج کے لیے قریبی اسپتالوں میں منتقل کر دیا گیا ہے۔

ٹی ایچ کیو اسپتال کاہنہ کی انتظامیہ نے تصدیق کی ہے کہ اسپتال میں 19 بچوں کو لایا گیا تھا، جن میں سے 14 بچے زخموں کی تاب نہ لاتے ہوئے جاں بحق ہو گئے جبکہ 5 بچے زیرِ علاج ہیں۔ ریسکیو حکام کا کہنا ہے کہ زخمی بچوں میں سے 4 سے 5 کی حالت تشویشناک ہے۔

ریسکیو 1122 کے مطابق حادثے کا شکار ہونے والے کمرے کی چھت ٹی آئرن اور گارڈرز پر مشتمل تھی جو اچانک گر گئی۔

اس رپورٹ کے فائل کیے جانے تک ریسکیو آپریشن جاری تھا اور امدادی ٹیمیں ملبے کو ہٹانے میں مصروف ہیں، تاکہ یہ یقین ہوسکے کہ کوئی اور بچہ اندر نہ پھنسا ہو۔ چھت گرنے کی حتمی وجہ اب تک سرکاری طور پر سامنے نہیں آسکی ہے۔