انگلینڈ کو بڑا جھٹکا، اولی رابنسن نیوزی لینڈ کے خلاف دوسرے ٹیسٹ سے باہر

برطانوی میڈیا کی رپورٹس کے مطابق نیوزی لینڈ کے خلاف پہلے ٹیسٹ میں پلیئر آف دی میچ کا اعزاز حاصل کرنے والے فاسٹ بولر اولی رابنسن دائیں گھٹنے کی تکلیف کے باعث دوسرے میچ سے باہر ہو گئے ہیں۔

انگلینڈ اینڈ ویلز کرکٹ بورڈ (ای سی بی) نے برطانیہ کے دفتری اوقات کے بعد اس معاملے پر تبصرے کی درخواست کا فوری طور پر کوئی جواب نہیں دیا۔

دو سال سے زائد عرصے بعد اپنا پہلا ٹیسٹ کھیلتے ہوئے رابنسن نے لارڈز کی مشکل پچ پر 7 وکٹیں حاصل کی تھیں، جس کی بدولت انگلینڈ نے 115 رنز سے فتح سمیٹی تھی۔ 32 سالہ بولر کو جمعے کے روز ٹریننگ سیشن کے بعد گھٹنے میں درد محسوس ہوا تھا، جس پر ہفتے کو ان کا احتیاطی اسکین کروایا گیا۔ ای سی بی نے اس سے قبل ہی ہنری کروکومب کو کور کے طور پر اسکواڈ میں شامل کر لیا تھا۔

تین ٹیسٹ میچوں کی سیریز کا دوسرا میچ بدھ سے دی اوول میں شروع ہو رہا ہے۔ انگلینڈ کی ٹیم پہلے ہی اپنے باقاعدہ کپتان بین اسٹوکس اور بولر گس اٹکنسن کے بغیر میدان میں اتر رہی ہے، جنہیں لندن کے ایک نائٹ کلب میں پیش آنے والے واقعے کی تحقیقات کے باعث دوسرے ٹیسٹ سے باہر کر دیا گیا تھا۔