فلپائن میں 7.8 شدت کے زلزلے سے 35 افراد ہلاک، درجنوں زخمی

فلپائن کے جنوبی علاقے میں پیر کے روز آنے والے 7.8 شدت کے طاقتور زلزلے کے نتیجے میں کم از کم 35 افراد ہلاک جبکہ 134 زخمی ہو گئے۔ حکام کے مطابق متعدد عمارتیں منہدم ہو گئیں اور ابتدائی طور پر سونامی کی وارننگ بھی جاری کی گئی، جسے بعد ازاں واپس لے لیا گیا۔

قومی ڈیزاسٹر مینجمنٹ حکام نے بتایا کہ کم از کم 12 افراد اب بھی لاپتا ہیں۔ زلزلے کا مرکز جنرل سانتوس شہر کے جنوب میں سمندر میں تھا، جہاں ہلاکتوں کی تعداد 12 تک پہنچ گئی۔ زلزلے کے بعد کئی طاقتور آفٹر شاکس بھی محسوس کیے گئے جن میں سب سے شدید جھٹکا 6.5 شدت کا تھا۔

جنرل سانتوس میں امدادی کارکن ایک گرے ہوئے سپر اسٹور کے ملبے تلے دبے دو ملازمین کو نکالنے کے لیے امدادی کارروائیاں جاری رکھے ہوئے ہیں۔ متاثرہ خاندانوں نے اپنے پیاروں کی بحفاظت بازیابی کی امید برقرار رکھی ہوئی ہے۔

سب سے زیادہ متاثر ہونے والے صوبے سارانگانی میں 14 افراد اس وقت ہلاک ہوئے جب زلزلے کے فوراً بعد لینڈ سلائیڈنگ نے پہاڑ کے دامن میں واقع گھروں کو ملبے تلے دبا دیا۔ صوبائی ڈیزاسٹر چیف رینی پونزالان کے مطابق بجلی کی معطلی اور مواصلاتی نظام کی خرابی کے باعث نقصانات کا مکمل اندازہ لگانے میں مشکلات پیش آ رہی ہیں۔

سوشل میڈیا پر سامنے آنے والی ویڈیوز میں جنرل سانتوس کے ایک شاپنگ سینٹر اور فاسٹ فوڈ ریسٹورنٹ کو مکمل طور پر تباہ شدہ دیکھا گیا، جبکہ ایک اسکول کی عمارت بھی منہدم ہو گئی۔

سونامی کے خدشے کے پیش نظر 2 ہزار سے زائد افراد کو ساحلی علاقوں سے محفوظ مقامات پر منتقل کیا گیا تھا۔ فلپائنی صدر نے عوام کو فوری طور پر بلند مقامات پر منتقل ہونے کی ہدایت کی تھی۔

فلپائن بحرالکاہل کے رنگ آف فائر میں واقع ہے، جہاں زلزلے اور آتش فشانی سرگرمیاں معمول کا حصہ سمجھی جاتی ہیں۔