پہلا ون ڈے: گرین شرٹس کا آسٹریلیا کے خلاف ٹاس جیت کر بولنگ کا فیصلہ

پاکستان نے تین ایک روزہ میچوں کی سیریز کے پہلے میچ میں آسٹریلیا کے خلاف ٹاس جیت کرفیلڈنگ کا فیصلہ کیا ہے۔

راولپنڈی کرکٹ اسٹیڈیم میں کھیلے جارہے میچ میں گرین شرٹس کپتان شاہین شاہ آفریدی نے ٹاس جیت کر فیلڈنگ کا فیصلہ کیا۔

شاہین آفریدی کا کہنا تھا پاکستانی ٹیم ون ڈے کرکٹ کی تاریخ میں آج اپنا ہزارواں میچ کھیل رہی ہے، پاکستان کیلئے ہزارویں میچ میں شرکت اور کپتانی کرنا اعزاز کی بات ہے۔

انہوں نے کہا کہ پوری ٹیم کیلئے یہ تاریخی موقع ہے، کوشش کریں گے کہ عمدہ پرفارمنس پیش کریں اور میچ میں کامیابی حاصل کریں۔

دورے کے لیے ابتدائی طور پر کپتان مقرر کیے جانے والے مچل مارش بھی ٹخنے کی انجری کے باعث باہر ہوگئے ہیں جس کے بعد اب جوش انگلس اس سیریز میں قیادت کے فرائض انجام دے رہے ہیں۔

کپتان جوش انگلس نے آسٹریلوی اسکواڈ کو باصلاحیت قرار دیا اور کہا کہ وہ حریف ٹیم کو سخت ٹکر دیں گے۔

جوش انگلس کا کہنا تھا کہ یقیناً مچل مارش کی خدمات سے محروم ہونا مایوس کن ہے اور بدقسمتی سے ہمیں کچھ دیگر کھلاڑیوں کی کمی کا بھی سامنا ہے لیکن ہمارے اسکواڈ میں کچھ انتہائی شاندار اور پرجوش کھلاڑی موجود ہیں۔