ایران کیساتھ ابھی معاہدہ نہیں ہوا ، دونوں ممالک معاہدے کے بہت قریب ہیں، جے ڈی وینس

امریکی نائب صدر جے ڈی وینس نے جمعرات کو صحافیوں کو بتایا کہ واشنگٹن ابھی ایران کے ساتھ کسی معاہدے پر نہیں پہنچا لیکن فریقین اس کے بہت قریب ہیں۔ انہوں نے مزید کہا کہ امریکا ایسی پوزیشن میں ہے جہاں وہ تہران کے جوہری پروگرام کو نمایاں حد تک پیچھے دھکیل سکتا ہے۔

ذرائع نے رائٹرز کو بتایا کہ جمعرات کو امریکہ اور ایران کے مابین جنگ بندی میں توسیع اور آبنائے ہرمز سے شپنگ پر عائد پابندیاں ہٹانے کا معاہدہ طے پاگیا تاہم یہ معاہدہ ابھی امریکی صدر ڈونلڈ ٹرمپ کی منظوری سے مشروط ہے۔

جے ڈی وینس نے بتایا کہ تہران کے ساتھ مذاکرات میں افزودہ یورینیم ذخائر اور افزودگی کے معاملے پر اب بھی چند اسٹکنگ پوائنٹس موجود ہیں۔

جے ڈی وینس کا کہنا تھا کہ یہ کہنا قبل از وقت ہے کہ صدر کب یا آیا اس مفاہمتی یادداشت پر دستخط کریں گے یا نہیں، ہم اس وقت معاہدے کی تحریر کے چند نکات پر تفصیلی تبادلہ خیال کررہے ہیں۔

انہوں نے مزید کہا کہ میں اس بات کی ضمانت تو نہیں دے سکتا کہ ہم حتمی معاہدے تک پہنچ ہی جائیں گے، لیکن فی الوقت میں اس حوالے سے کافی پرامید ہوں۔