دو ماہ کے دوران دنیا نے 1 ارب بیرل تیل کی سپلائی کھو دی، سی ای او آرامکو

سعودی آرامکو کے سی ای او امین ناصر نے اتوار کے روز کہا ہے کہ گزشتہ دو ماہ کے دوران دنیا نے تقریباً 1 ارب بیرل تیل کی سپلائی کھو دی ہے، اور اگرچہ سپلائی دوبارہ بحال بھی ہو جائے تو توانائی کی منڈیاں معمول پر آنے میں وقت لیں گی، کیونکہ اس وقت سپلائی چین شدید دباؤ کا شکار ہے اور آبنائے ہرمز کے ذریعے شپنگ میں رکاوٹیں پیدا ہو رہی ہیں۔

انہوں نے رائٹرز کو دیے گئے بیان میں کہا کہ ہمارا مقصد سادہ ہے کہ توانائی کی فراہمی کو جاری رکھنا، چاہے نظام شدید دباؤ میں ہی کیوں نہ ہو۔

انہوں نے کہا کہ ایران کی جانب سے آبنائے ہرمز میں رکاوٹوں کے باعث عالمی توانائی سپلائی میں شدید کمی واقع ہوئی ہے، جس سے شپنگ متاثر ہوئی ہے اور امریکی و اسرائیلی جنگ کے بعد تیل کی قیمتوں میں اضافہ دیکھنے میں آیا ہے۔

انہوں نے کہا کہ راستوں کا دوبارہ کھل جانا اس بات کے برابر نہیں کہ ایک ایسی مارکیٹ معمول پر آ جائے جس سے تقریباً 1 ارب بیرل تیل غائب ہو چکا ہو۔ ان کے مطابق کئی سالوں کی کم سرمایہ کاری نے پہلے ہی کمزور عالمی تیل کے ذخائر پر مزید دباؤ ڈال دیا ہے۔

آرامکو نے ہرمز آبنائے کو بائی پاس کرنے کے لیے اپنی ایسٹ ویسٹ پائپ لائن استعمال کی ہے تاکہ خام تیل کو بحیرہ احمر تک پہنچایا جا سکے۔ سی ای او نے اس پائپ لائن کو ایک اہم لائف لائن قرار دیا جو عالمی سپلائی بحران کو کم کرنے میں مدد فراہم کر رہی ہے۔

انہوں نے کہا کہ شپنگ راستوں میں تبدیلی کے باوجود ایشیا اب بھی کمپنی کی ترجیح ہے اور عالمی طلب کا مرکزی محور بھی وہی خطہ ہے۔