انٹربینک: ڈالر کے مقابلے میں روپے کی پیش قدمی جاری

انٹربینک مارکیٹ میں بدھ کو بھی ڈالر کے مقابلے روپے کی قدر میں بہتری کا سلسلہ جاری رہا۔

اسٹیٹ بینک کے مطابق کاروبار کے اختتام پر ڈالر کے مقابلے میں روپیہ ایک پیسے کی بہتری سے 278.80 روپے پر بند ہوا۔

یاد رہے کہ منگل کو مقامی کرنسی 278.81 روپے پر بند ہوئی تھی۔

دریں اثنا وزیر اعظم شہباز شریف نے بدھ کو کہا کہ پاکستان کا تیل کی درآمدات کا بل تقریباً 167 فیصد اضافے کے ساتھ 800 ملین ڈالر فی ہفتہ تک پہنچ گیا ہے جو جاری علاقائی تنازع سے قبل تقریباً 300 ملین ڈالر تھا۔

وزیر اعظم نے اس بات کا انکشاف آج کابینہ کے اجلاس سے خطاب کے دوران کیا۔

مزید برآں بدھ کو ڈالر کی قدر میں استحکام رہا اور ایشیائی تجارت کے دوران کرنسیوں کے نرخ محدود حد میں رہے کیونکہ جاپان میں تعطیل کے باعث مارکیٹیں بند تھیں اور کئی اہم مرکزی بینکوں کے بڑے فیصلے اب بھی متوقع ہیں۔

ڈالر کے مقابلے میں یورو کی آخری قیمت 1.1716 ڈالر رہی جبکہ اسٹرلنگ (پاؤنڈ) 1.3523 ڈالر پر برقرار رہا اور اس میں کوئی خاص تبدیلی نہیں دیکھی گئی۔ یہ دونوں کرنسیاں رواں ماہ کے آغاز میں اپنی بلند ترین سطح پر پہنچنے کے بعد اب بتدریج نیچے آ رہی ہیں۔