خیبر پختونخوا میں طوفانی بارشوں سے 25 افراد جاں بحق، درجنوں زخمی

خیبر پختونخوا میں 25 مارچ سے جاری بارشوں کے دوران مختلف حادثات میں کم از کم 25 افراد جاں بحق اور درجنوں زخمی ہو چکے ہیں۔

پروونشل ڈیزاسٹر مینجمنٹ اتھارٹی (پی ڈی ایم اے) کی رپورٹ کے مطابق بارشوں سے بڑے پیمانے پر نقصان ہوا ہے اور مجموعی طور پر 77 مکانات متاثر ہوئے ہیں، جن میں سے 33 مکمل طور پر تباہ ہو گئے۔ کوہاٹ، بنوں، ڈیرہ اسماعیل خان اور کرک سب سے زیادہ متاثر ہونے والے اضلاع میں شامل ہیں۔

اس دوران ریسکیو 1122 کی ٹیمیں متاثرہ علاقوں میں تعینات کر دی گئی ہیں جو متاثرہ خاندانوں کو طبی امداد اور عارضی پناہ گاہوں سمیت ہنگامی معاونت فراہم کر رہی ہیں۔ بارشوں کے باعث رابطہ منقطع ہونے والے دور دراز علاقوں میں ملبہ ہٹانے اور راستوں کی بحالی کا کام بھی جاری ہے۔

پی ڈی ایم اے نے صوبے کے مختلف حصوں میں مزید بارشوں کا الرٹ جاری کیا ہے، جس کے مطابق یہ سلسلہ 4 اپریل تک برقرار رہنے کا امکان ہے۔

مغربی ہواؤں کے زیر اثر پاکستان بھر میں تیز ہواؤں اور برسات کا سلسلہ جاری ہے۔ بلوچستان کے مختلف حصوں سمیت سندھ اور کراچی میں بھی گرج چمک کے ساتھ بارشیں رپورٹ ہوئی ہیں۔ پی ڈی ایم اے بلوچستان کے مطابق صوبے میں اب تک بارش سے متعلقہ واقعات میں 7 افراد اپنی جانیں گنوا چکے ہیں۔