علاقائی صورتحال کے پیش نظر وزیرِ خزانہ کی بینکوں سے مشاورت

وفاقی وزیرِ خزانہ و ریونیو سینیٹر محمد اورنگزیب نے بدھ کے روز پاکستان بینکس ایسوسی ایشن (پی بی اے) اور بڑے بینکوں کی سینئر قیادت کے ساتھ ایک ورچوئل اجلاس کیا، جس میں علاقائی پیش رفت کے تناظر میں ابھرتی ہوئی معاشی اور مالیاتی صورتحال کا جائزہ لیا گیا۔

اجلاس میں پی بی اے کے چیئرمین ظفر مسعود اور سرکردہ بینکوں کے صدور نے شرکت کی۔ اس دوران حکومت، اسٹیٹ بینک آف پاکستان (ایس بی پی) اور بینکاری شعبے کے درمیان قریبی رابطے کے ذریعے مالیاتی استحکام اور بینکاری خدمات کے بلاتعطل تسلسل کو یقینی بنانے پر زور دیا گیا۔

وزیر خزانہ نے شرکاء کو صورتحال کی نگرانی اور ممکنہ معاشی مضمرات کا جائزہ لینے کے لیے حکومت کی جانب سے اٹھائے گئے اقدامات پر بریفنگ دی۔

انہوں نے بتایا کہ پیش رفت کا مسلسل جائزہ لینے کے لیے اہم اقتصادی وزارتوں اور متعلقہ اداروں پر مشتمل ایک اعلیٰ سطحی رابطہ نظام قائم کیا گیا ہے۔

یہ فورم عالمی منڈیوں کے رجحانات، خصوصاً سپلائی چینز اور توانائی کی منڈیوں کی صورتحال کا باریک بینی سے جائزہ لے رہا ہے اور پاکستان کے اہم معاشی اشاریوں پر ان کے ممکنہ اثرات کا بھی تجزیہ کر رہا ہے۔

محمد اورنگزیب نے کہا کہ حکومت مہنگائی، بیرونی کھاتوں اور مجموعی معاشی استحکام پر ممکنہ اثرات کا جائزہ لینے کے لیے باقاعدگی سے سیناریو اینالیسس کر رہی ہے۔

انہوں نے زور دیا کہ حکام ضروری اشیا کی بلاتعطل فراہمی یقینی بنانے اور میکرو اکنامک استحکام برقرار رکھنے پر توجہ مرکوز کیے ہوئے ہیں، جبکہ ابھرتی ہوئی صورتحال پر بروقت اور محتاط ردعمل دیا جا رہا ہے۔

وزیر خزانہ نے مربوط فیصلہ سازی کی اہمیت اجاگر کرتے ہوئے کہا کہ مارکیٹ کے اعتماد کو برقرار رکھنے اور مالیاتی منڈیوں کے ہموار عمل کو یقینی بنانے میں مالیاتی شعبہ کلیدی کردار ادا کر رہا ہے۔

انہوں نے بینکوں کی حوصلہ افزائی کی کہ وہ ذمہ دارانہ رسک مینجمنٹ کے طریقوں کو برقرار رکھتے ہوئے کاروبار اور صارفین کی حمایت جاری رکھیں اور بلاتعطل مالیاتی خدمات فراہم کرنے کے لیے اپنی آپریشنل لچک کو یقینی بنائیں۔

محمد اورنگزیب نے بینکنگ انڈسٹری کے ساتھ کھلے رابطے کو برقرار رکھنے کے حکومتی عزم کا اعادہ کرتے ہوئے کہا کہ حکام اسٹیٹ بینک آف پاکستان (ایس بی پی) اور مالیاتی اداروں کے ساتھ مل کر پیش رفت کا مربوط انداز میں جواب دیتے رہیں گے۔

اس سے قبل پاکستان بینکس ایسوسی ایشن (پی بی اے) کے چیئرمین ظفر مسعود نے وزیر خزانہ کو بینکنگ سیکٹر کی مشاورت اور ابھرتی ہوئی صورتحال کے تناظر میں کیے گئے تیاری کے اقدامات سے آگاہ کیا۔

انہوں نے کہا کہ بینکنگ انڈسٹری نے مالیاتی منڈیوں اور آپریشنل تسلسل پر ممکنہ اثرات کا جائزہ لیا ہے اور صارفین و کاروباروں کو بلاتعطل خدمات فراہم کرنے کو یقینی بنانے پر توجہ دی جا رہی ہے۔

ظفر مسعود نے مزید بتایا کہ انڈسٹری نے مالیاتی اداروں کے درمیان بروقت مشاورت اور معلومات کے تبادلے کے لیے ایک کوآرڈینیشن فریم ورک قائم کیا ہے اور مالیاتی خدمات اور ادائیگی کے بنیادی ڈھانچے کے ہموار عمل کو یقینی بنانے کے لیے اہم اسٹیک ہولڈرز کے ساتھ رابطے میں ہے۔

انہوں نے مالیاتی منڈیوں کے استحکام اور تجارت و مالیاتی بہاؤ کو سہل بنانے کے لیے حکومت اور ریگولیٹرز کے ساتھ مل کر کام جاری رکھنے کے عزم کا اعادہ کیا۔