پشاور زلمی نے مصباح الحق کو پی ایس ایل 11 کے لیے بیٹنگ کوچ مقرر کر دیا
- سابق کپتان اور ٹیسٹ کرکٹر اپنے ساتھ اعلیٰ ترین سطح پر قیادت کا وسیع تجربہ لائے ہیں
پشاور زلمی نے سابق قومی کپتان اور مایہ ناز ٹیسٹ کرکٹر مصباح الحق کو ایچ بی ایل پی ایس ایل کے گیارہویں سیزن کے لیے ٹیم کا بیٹنگ کوچ مقرر کر دیا۔ فرنچائز نے ایک بیان میں اس کی تصدیق کرتے ہوئے اسے مصباح کی زلمی میں ”گھر واپسی ” قرار دیا ہے، جہاں وہ ماضی میں بطور کھلاڑی بھی خدمات انجام دے چکے ہیں۔
اپنی تکنیکی مہارت اور ”کول مائنڈڈ ” شخصیت کے لیے مشہور مصباح الحق اعلیٰ سطح کی قیادت کا وسیع تجربہ رکھتے ہیں۔ زلمی انتظامیہ کا ماننا ہے کہ مصباح کی شمولیت سے ٹیم کے بیٹنگ یونٹ کی کارکردگی میں نمایاں بہتری آئے گی۔ میدان میں زلمی کی جرسی پہننے سے لے کر اب ڈگ آؤٹ سے کھلاڑیوں کی رہنمائی تک مصباح کا یہ سفر فرنچائز کے لیے ایک بڑی تقویت ثابت ہوگا۔
پشاور زلمی کے چیئرمین جاوید آفریدی نے مصباح کو خوش آمدید کہتے ہوئے کہا کہ ان کا شاندار کیریئر اور کرکٹ کی گہری سمجھ بوجھ پی ایس ایل 11 میں بیٹنگ لائن اپ کو نئی بلندیوں تک لے جانے میں معاون ثابت ہوگی۔
انہوں نے مزید کہا کہ مصباح فرنچائز کے کلچر سے بخوبی واقف ہیں۔ واضح رہے کہ پی ایس ایل 11 کا آغاز رواں ماہ کے آخر میں ہو رہا ہے، جس کے لیے زلمی نے اپنے کوچنگ سیٹ اپ کو مزید مستحکم کر لیا ہے۔