ڈالر کے مقابلے میں روپیہ مزید تگڑا

انٹربینک مارکیٹ میں منگل کو ڈالر کے مقابلے روپے کی قدر میں اضافہ ریکارڈ کیا گیا۔

کاروبار کے اختتام پرڈالر کے مقابلے میں روپیہ ایک پیسے کی بہتری سے 279.91 روپے پر بند ہوا۔

یاد رہے کہ پیر کو ڈالر کے مقابلے میں روپیہ 279.92 روپے پر بند ہوا تھا۔

عالمی سطح پر منگل کو ابتدائی تجارت کے دوران ڈالر ایک ہفتے کی کم ترین سطح پر آگیا، یہ گراوٹ وائٹ ہاؤس کی جانب سے گرین لینڈ کے مستقبل کے معاملے پر یورپی یونین کو دی جانے والی دھمکیوں کے بعد سامنے آئی جس کے نتیجے میں امریکی اسٹاکس اور سرکاری بانڈز کی بڑے پیمانے پر فروخت شروع ہوگئی۔

ڈالر انڈیکس 0.1 فیصد گر کر 99.004 پر آ گیا جو کہ 14 جنوری کے بعد اس کی کم ترین سطح ہے۔

پیر کو امریکی صدر ڈونلڈ ٹرمپ کی جانب سے یورپی اتحادیوں کو ٹیرف (درآمدی محصولات) کی نئی دھمکیوں نے ایک بار پھر سیل امریکہ کے اس رجحان کو جنم دیا جو گزشتہ سال اپریل میں یومِ آزادی کے موقع پر ٹیرف کے اعلان کے بعد سامنے آیا تھا؛ جس کے نتیجے میں اسٹاکس، ٹریژری بانڈز اور ڈالر سب کی قدر میں گراوٹ دیکھی گئی۔ مارٹن لوتھر کنگ جونیئر ڈے کی عوامی تعطیل کے بعد امریکی مارکیٹیں منگل کو دوبارہ کھلیں گی۔