صدر مملکت اور وزیرِاعظم کا ملکی ترقی کیلئے قائداعظم کے وژن پر عملدرآمد کا اعادہ
- مسلح افواج نے بھی قائد اعظم کے نظریے سے غیر متزلزل وابستگی کا اظہار کیا
صدرِ پاکستان آصف علی زرداری اور وزیرِاعظم شہباز شریف نے ملکی ترقی اور خوشحالی کے لیے قائداعظم محمد علی جناح ؒ کے نقشِ قدم پر چلنے کے عزم کا اعادہ کیا۔
قوم آج بابائے قوم کا 149 ویں یومِ پیدائش منا رہی ہے۔ اس موقع پر دن کا آغاز وفاقی دارالحکومت میں 31 اور صوبائی دارالحکومتوں میں 21 توپوں کی سلامی سے ہوا، جبکہ کراچی میں مزارِ قائد پر گارڈز کی تبدیلی کی تقریب بھی منعقد کی گئی۔
اپنے پیغام میں صدرِ مملکت نے قائداعظم کو خراجِ عقیدت پیش کرتے ہوئے کہا کہ وہ جمہوریت، انصاف اور مساوات کے علمبردار تھے۔
پاکستان پیپلز پارٹی کے بیان کے مطابق صدر نے کہا کہ قائداعظم نے ہمیں اتحاد، ایمان اور نظم و ضبط کا پیغام دیا، جو آج بھی قوم کے لیے واضح رہنمائی فراہم کرتا ہے۔
انہوں نے کہا کہ قائد کے اصولوں کی بدولت ترقی، سماجی ہم آہنگی اور باہمی اعتماد کو فروغ ملتا ہے۔ صدر نے تمام پاکستانیوں سے اپیل کی کہ وہ قائداعظم کے منصفانہ، جمہوری اور بااعتماد پاکستان کے وژن کو عملی جامہ پہنانے کے لیے متحد ہو کر کام کریں۔
وزیرِاعظم شہباز شریف نے کہا کہ یہ دن قائداعظم کے رہنما اصولوں، جمہوریت، آئین کی بالادستی، سماجی انصاف، مذہبی ہم آہنگی اور قانون کی حکمرانی پر مبنی فلاحی ریاست کے وژن سے وابستگی کے ازسرِنو عہد کا موقع فراہم کرتا ہے۔
انہوں نے کہا کہ ایمان، اتحاد اور نظم و ضبط کے اصول قومی طاقت کی بنیاد ہیں اور آنے والی نسلوں کے لیے مشعلِ راہ رہیں گے۔
دریں اثنا فیلڈ مارشل سید عاصم منیر، چیف آف دی نیول اسٹاف ایڈمرل نوید اشرف اور چیف آف دی ایئر اسٹاف ایئر چیف مارشل ظہیر احمد بابر سدھو نے بھی مسلح افواجِ کی جانب سے بابائے قوم کو بھرپور خراجِ عقیدت پیش کیا۔ آئی ایس پی آر کے مطابق مسلح افواج نے قائداعظم کے مضبوط، خودمختار، جمہوری اور خوشحال پاکستان کے وژن سے غیر متزلزل وابستگی کا اعادہ کرتے ہوئے ملک کی سلامتی، استحکام اور ترقی کے لیے کردار ادا کرنے کے عزم کا اظہار کیا۔