فائرنگ واقعے کے بعد بونڈی کے شہریوں کی کرسمس کی خوشیاں ماند پڑگئیں

سڈنی کے مشہور بونڈی بیچ پر کرسمس تقریبات میں خاموشی چھائی رہی۔ گزشتہ دنوں پیش آنے والے 3 دہائیوں کے خطرناک و افسوسناک فائرنگ کے واقعے میں 15 افراد ہلاک ہو گئے تھے، جس کے اثرات سے کمیونٹی ابھی تک باہر نہیں آئی ہے۔

بونڈی کے ساحل پر پولیس گشت جاری رہا ، جو کرسمس کے روایتی مقامات میں شمار ہوتا ہے، جہاں سینکڑوں لوگ، جن میں سے کئی نے سانتا ہیٹ پہنی ہوئی تھی، ریت پر جمع تھے۔

برطانوی سیاح مارک کونروی نے رائٹرز سے کہا کہ میرے خیال میں یہ المیہ ہے اور ہر کوئی اس واقعے کا احترام کرتا ہے اور بہت افسردہ ہے۔ لوگ یہاں ساحل پر اس لیے موجود ہیں کہ یہ ایک جشن کی طرح ہے، لیکن سب کے ذہنوں میں یہ واقعہ موجود ہے۔

انہوں نے مزید کہا کہ ہر کوئی ان خاندانوں اور دوستوں کے لیے محسوس کر رہا ہے جو سب سے برا وقت گزار رہے ہیں جو آپ تصور کر سکتے ہیں۔

یاد رہے کہ 14 دسمبر کو یہ فائرنگ یہودی حنوکہ کی تقریب کے دوران ہوئی تھی، جس نے اسلحہ قوانین میں سختی لانے اور یہود دشمنی کے خلاف سخت اقدامات کی اپیلیں بڑھا دی ہیں۔بعدازاں سڈنی میں نئے قوانین کے تحت عوامی اجتماعات کے قواعد بھی سخت کر دیے گئے ہیں۔

ساحل پر موجود لوگ کرسمس ٹری کے ساتھ تصاویر لیتے نظر آئے، جبکہ کچھ لائف گارڈز کے ساتھ پوز دیتے رہے۔ تاہم، ہوا کے تیز جھکڑوں کی وجہ سے بھیڑ کم دکھائی دی۔

سورف لائف سیونگ پٹرول کے کپتان تھامس ہوگ نے کہا آج کرسمس ڈے کے لیے حالات مثالی نہیں ہیں لیکن لوگ پھر بھی یہاں موجود ہیں۔

واقعے کے مقام کے قریب ہیرٹیج لسٹڈ بونڈی پیویلین کے باہر جھنڈے آدھے سر پر لہرا رہے تھے۔ پولیس کا کہنا ہے کہ یہ حملہ مبینہ طور پر ایک باپ اور بیٹے نے کیا، جنہوں نے شدت پسند گروپ اسلامی ریاست سے متاثر ہو کر یہ اقدام کیا۔