بنوں حملے میں شمالی وزیرستان کے اسسٹنٹ کمشنر اور 2 پولیس اہلکار شہید
- صدر آصف علی زرداری کا اظہار افسوس، شہداء کے خاندانوں کے لیے دلی ہمدردی اور تعزیت کا اظہار
ضلع بنوں ماماش خیل میں اسسٹنٹ کمشنر شمالی وزیرستان کی گاڑی پر حملہ کیا گیا جس میں اسسٹنٹ کمشنر اور 2 پولیس اہلکار سمیت 4 افراد شہید اور متعدد زخمی ہوگئے۔
صدر آصف علی زرداری نے بنوں حملے میں شمالی وزیرستان کے اسسٹنٹ کمشنر سمیت چار افراد کے شہید ہونے پر افسوس کا اظہار کیا ہے۔
صدر نے شہداء کے خاندانوں کے لیے دلی ہمدردی اور تعزیت کا اظہار کیا، شہداء کے لیے مغفرت اور سوگوار خاندانوں کے لیے صبر کی دعا کی۔
صدر زرداری نے دہشت گردانہ حملے کی مذمت کرتے ہوئے کہا کہ ملک میں بیرونی حمایت یافتہ دہشت گردوں کا مکمل خاتمہ قومی اجماع کے ذریعے کیا جارہا ہے۔
انہوں نے زخمی پولیس اہلکاروں کی جلد صحت یابی کی دعا کی اور متعلقہ اداروں کو ہدایت دی کہ حملہ آوروں کو فوری گرفتار کیا جائے۔
دریں اثنا خیبر پختونخوا کے وزیراعلیٰ سہیل آفریدی نے بھی واقعے پر افسوس کا اظہار کیا اور صوبائی انسپکٹر جنرل پولیس سے رپورٹ طلب کی۔ انہوں نے حکام کو ہدایت دی کہ زخمیوں کو فوری طبی سہولتیں فراہم کی جائیں۔
انہوں نے کہا کہ یہ ایک انتہائی افسوسناک واقعہ ہے۔ اینٹی نیشنل عناصر ایسے بزدلانہ حملوں سے ہمارے عزم کو کمزور نہیں کرسکتے۔ شہداء کی قربانیاں ضائع نہیں جائیں گی اور دہشت گردی کے خلاف جنگ مزید مضبوط عزم کے ساتھ جاری رہے گی۔