گھر والوں کے ساتھ زیادہ وقت گزارنے کے لیے جلد ریٹائر ہو جاؤں گا، رونالڈو کا اعلان

ال نصر کے اسٹار فٹبالر کرسٹیانو رونالڈو نے کہا ہے کہ وہ جلد ہی فٹبال سے ریٹائر ہو جائیں گے تاکہ اپنے اہلِ خانہ کے ساتھ زیادہ وقت گزار سکیں۔ چالیس سالہ پرتگالی کھلاڑی کا کہنا ہے کہ اگرچہ اپنے شاندار کیریئر کا اختتام اُن کے لیے ایک مشکل فیصلہ ہوگا، لیکن وہ کافی عرصے سے فٹبال کے بعد کی زندگی کی منصوبہ بندی کر رہے ہیں۔

رونالڈو، جو کلب اور ملک کے لیے مجموعی طور پر 952 گولز کے ساتھ فٹبال کی تاریخ کے سب سے کامیاب گول اسکورر ہیں، نے گزشتہ ماہ کہا تھا کہ وہ ریٹائرمنٹ سے قبل 1000 گولز کا سنگِ میل عبور کرنے کا ارادہ رکھتے ہیں۔

پانچ بار کے بیلن ڈی آر ایوارڈ یافتہ اسٹار سے جب پوچھا گیا کہ وہ کب اپنے جوتے لٹکائیں گے تو انہوں نے مسکراتے ہوئے کہا کہ “جلد ہی۔”

انہوں نے منگل کے روز شائع ایک انٹرویو میں پروگرام ”پیرس مورگن اَن سینسرڈ“ پر گفتگو کرتے ہوئے کہا کہ “مجھے لگتا ہے کہ میں اس کے لیے تیار ہوں، اگرچہ یہ بہت مشکل ہوگا۔ لیکن میں نے 25، 26، 27 سال کی عمر سے ہی اپنے مستقبل کی تیاری شروع کر دی تھی۔ میں اس دباؤ کو برداشت کرنے کے قابل ہوں۔ فٹبال میں گول کرنے کا جوش و خروش کسی اور چیز سے نہیں ملایا جا سکتا۔”

انہوں نے مزید کہا کہ ہر چیز کا آغاز بھی ہوتا ہے اور اختتام ۔ اب میں اپنے لیے، اپنے خاندان کے لیے اور اپنے بچوں کی پرورش کے لیے زیادہ وقت نکالوں گا۔

مانچسٹر یونائیٹڈ کے سابق فارورڈ نے کہا کہ وہ اب بھی اپنے پرانے کلب کے نتائج پر نظر رکھتے ہیں، حالانکہ اُن کا دوسرا دور تین سال قبل ناخوشگوار انداز میں ختم ہوا تھا۔ گزشتہ سیزن میں مانچسٹر یونائیٹڈ نے 1973-74 کے بعد اپنی بدترین پوزیشن حاصل کی اور لیگ میں پندرہویں نمبر پر رہی۔

رونالڈو نے کہا کہ مجھے افسوس ہے، کیونکہ مانچسٹر یونائیٹڈ دنیا کے اہم ترین کلبوں میں سے ایک ہے، اور یہ کلب آج بھی میرے دل کے بہت قریب ہے۔ لیکن اس کے پاس کوئی مضبوط ڈھانچہ نہیں۔ میں امید کرتا ہوں کہ موجودہ اور آنے والے وقت میں تبدیلی آئے، کیونکہ اس کلب میں بے پناہ صلاحیت موجود ہے۔

انہوں نے مزید کہا کہ وہ اس وقت درست سمت میں نہیں جا رہے۔ اور یہ صرف کوچ یا کھلاڑیوں کا مسئلہ نہیں ہے۔ میری رائے میں مینیجر روبن اموریم اپنی پوری کوشش کر رہے ہیں، لیکن معجزے ممکن نہیں ہوتے۔