پاکستان انٹرنیشنل ایئرلائنز (پی آئی اے) کو باضابطہ طور پر برطانیہ کے لیے ’تھرڈ کنٹری آپریٹر(ٹی سی او) کی منظوری مل گئی ہے۔ اس کا مطلب ہے کہ اب دونوں ممالک کے درمیان براہ راست پروازیں چلائی جا سکتی ہیں۔
قومی ایئر لائن نے بدھ کو ایک پریس بیان میں کہا کہ پی آئی اے کو جامع اور ہمہ جہتی منظوری دی گئی جس سے پی آئی اے براہ راست پروازیں آپریٹ کرے گا اور نہ صرف مسافر بلکہ کارگو بھی لے کر جائے گا۔
پروازوں کا آغاز اکتوبر سے کیا جائے گا جس کا آغاز مانچسٹر سے ہوگا۔
بعد ازاں جب پروازوں کا باقاعدہ آغاز ہو جائے گا تو برمنگھم اور لندن کو بھی پی آئی اے کے فضائی شیڈول میں شامل کیا جائے گا۔
مزید برآں، برطانیہ کے ڈپارٹمنٹ فار ٹرانسپورٹ نے پی آئی اے کو ایئر کارگو کیریئر 3 (اے سی سی 3) سرٹیفکیٹ بھی جاری کیا ہے جو سیکیورٹی اور کارگو آپریشنز دونوں کے لیے ہے اور پانچ سال تک مؤثر رہے گا۔
اس سے قبل جولائی میں فضائی تحفظ میں بہتری کے بعد برطانیہ کی ایئر سیفٹی کمیٹی نے پاکستانی ایئرلائنز پر عائد پابندیاں ختم کردی تھیں۔
معطلی سے پہلے، پی آئی اے برطانیہ کے لیے ہفتہ وار 21 پروازیں چلاتی تھی جن میں 10 لندن، 9 مانچسٹر اور 2 برمنگھم کے لیے شامل تھیں۔
پروازوں کی بحالی پاکستانی مسافروں کے لیے برطانیہ اور یورپ کا سفر کرنے میں رابطے کو نمایاں طور پر بہتر بنائے گی۔