اسٹاک ایکسچینج میں تیزی کا تسلسل، 5 کمپنیاں 2 ارب ڈالر سے زائد مارکیٹ کیپیٹلائزیشن کے ساتھ نمایاں

پاکستان اسٹاک ایکسچینج (پی ایس ایکس) نے حالیہ ہفتوں میں ریکارڈ سطحیں عبور کی ہیں، جہاں کے ایس ای 100 انڈیکس 130,000 پوائنٹس سے اوپر مستحکم نظر آ رہا ہے۔ جمعے کے روز انڈیکس 131,949.07 کی بلند ترین سطح پر بند ہوا۔ ماہرین اس غیر معمولی کارکردگی کو ادارہ جاتی سرمایہ کاری، مضبوط کمپنی منافع جات کی توقعات اور مثبت معاشی اشاریوں کا نتیجہ قرار دے رہے ہیں۔

کے ایس ای 100 انڈیکس کو مارکیٹ کی کارکردگی کا اہم پیمانہ تصور کیا جاتا ہے۔ اسی مناسبت سے بزنس ریکارڈر نے 2 ارب ڈالر یا اس سے زائد مارکیٹ کیپیٹلائزیشن رکھنے والی کمپنیوں کی فہرست مرتب کی ہے۔

7 جولائی 2025 تک پی ایس ایکس میں 5 کمپنیاں ایسی ہیں جن کی مارکیٹ کیپیٹلائزیشن 2 ارب ڈالر سے تجاوز کر چکی ہے، جن میں سرفہرست او جی ڈی سی ہے، جس کی مارکیٹ کیپیٹلائزیشن 3.46 ارب ڈالر ہے۔

• آئل اینڈ گیس ڈیولپمنٹ کمپنی لمیٹڈ (او جی ڈی سی)

آئل اینڈ گیس ڈیولپمنٹ کمپنی لمیٹڈ (پی ایس ایکس:او جی ڈی سی) پاکستان کی سب سے بڑی ایکسپلوریشن اینڈ پروڈکشن (ای اینڈ پی) کمپنی ہے، جو تیل و گیس کی تلاش، ڈرلنگ آپریشن سروسز، پیداوار، ریزروائر مینجمنٹ اور انجینئرنگ سپورٹ سمیت مختلف شعبوں میں سرگرم عمل ہے۔

او جی ڈی سی کے پاس پاکستان میں سب سے زیادہ ایکسپلوریشن ایریا موجود ہے، جو ملک کی کل دی گئی ایکڑوں کا 40 فیصد سے زائد حصہ بنتا ہے۔ یہ علاقے تیل اور گیس کے نیٹ ہائیڈروکاربن ذخائر پر مشتمل ہیں۔

پاکستان کی حکومت او جی ڈی سی کی سب سے بڑی شیئر ہولڈر ہے، جس کے پاس 67 فیصد سے زائد حصص ہیں۔ اس کے بعد او جی ڈی سی ایمپلائی ایمپاورمنٹ ٹرسٹ اور پرائیویٹائزیشن کمیشن آف پاکستان حصص رکھنے والے بڑے اداروں میں شامل ہیں۔

پاکستان اسٹاک ایکسچینج (پی ایس ایکس) پر درج او جی ڈی سی کے پروفائل کے مطابق، یہ کمپنی 23 اکتوبر 1997 کو کمپنیز آرڈیننس 1984 (جو اب کمپنیز ایکٹ 2017 ہے) کے تحت قائم کی گئی تھی۔

او جی ڈی سی کو تیل و گیس کے وسائل کی تلاش اور ترقی، پیداوار، فروخت اور ان سے متعلق سرگرمیوں کی انجام دہی کے لیے قائم کیا گیا تھا۔ یہ وہ سرگرمیاں تھیں جو اس سے قبل 1961 میں قائم ہونے والی آئل اینڈ گیس ڈیولپمنٹ کارپوریشن کے تحت انجام دی جاتی تھیں۔

اس وقت او جی ڈی سی کی پاکستان اسٹاک ایکسچینج پر مارکیٹ کیپیٹلائزیشن 3.46 ارب امریکی ڈالر ہے۔

• یونائیٹڈ بینک لمیٹڈ (یو بی ایل)

یونائیٹڈ بینک لمیٹڈ (یو بی ایل) ایک معروف کمرشل بینک ہے جو 1959 میں پاکستان میں قائم کیا گیا۔ یہ بینک پاکستان میں رجسٹرڈ ہے اور کمرشل بینکاری اور اس سے متعلقہ خدمات فراہم کرتا ہے۔ یو بی ایل بیسٹ وے انٹرنیشنل ہولڈنگز لمیٹڈ کا ذیلی ادارہ ہے، جو مکمل طور پر بیسٹ وے گروپ لمیٹڈ کی ملکیت ہے۔

یو بی ایل کا پاکستان میں برانچز کا ایک بڑا نیٹ ورک ہے، جس میں 1,765 سے زائد برانچز اور 1,750 سے زائد اے ٹی ایمز شامل ہیں۔ اس کے ساتھ ساتھ، بینک کی برانچ لیس بینکنگ سروس یو بی ایل اومنی ملک بھر میں دستیاب ہے، جیسا کہ بینک کی ویب سائٹ پر درج معلومات سے ظاہر ہوتا ہے۔

بیسٹ وے گروپ ایک متنوع، خاندانی ملکیت پر مبنی بین الاقوامی کاروباری ادارہ ہے، جس کا سالانہ ٹرن اوور 4.5 ارب برطانوی پائونڈ سے زائد ہے۔ اس گروپ نے اپنی شروعات ریٹیل اسٹورز سے کی، اور وقت کے ساتھ ساتھ یہ گروپ ہول سیل، فارمیسی، ریئل اسٹیٹ، سیمنٹ اور بینکاری جیسے مختلف شعبوں میں پھیل چکا ہے۔

پاکستان اسٹاک ایکسچینج (پی ایس ایکس) میں یو بی ایل کی مارکیٹ کیپیٹلائزیشن اس وقت 2.98 ارب امریکی ڈالر ہے۔

• ماری پیٹرولیم کمپنی لمیٹڈ (ماری)

ماری پیٹرولیم کمپنی لمیٹڈ، جو سندھ کے ضلع گھوٹکی کے علاقے ڈہرکی میں واقع ماری گیس فیلڈ میں ملک کے سب سے بڑے گیس ذخیرے کو چلاتی ہے، پاکستان میں قدرتی گیس کی دوسری سب سے بڑی پیداوار کنندہ کمپنی ہے۔

یہ ایک پبلک لمیٹڈ کمپنی ہے جو 1984 میں پاکستان میں رجسٹرڈ ہوئی۔ ماری پیٹرولیم ایک مکمل طور پر مربوط تیل و گیس کی تلاش اور پیداوار کی کمپنی ہے، جس کی ایکسپلوریشن میں کامیابی کی شرح تقریباً 70 فیصد ہے — جو کہ قومی اوسط (33 فیصد) اور عالمی اوسط (14 فیصد) سے کہیں زیادہ ہے۔

کمپنی کے اہم صارفین میں کھاد ساز ادارے، بجلی پیدا کرنے والی کمپنیاں، گیس کی تقسیم کار کمپنیاں اور ریفائنریز شامل ہیں۔

پاکستان اسٹاک ایکسچینج (پی ایس ایکس) میں ماری پیٹرولیم کی مارکیٹ کیپیٹلائزیشن اس وقت 2.73 ارب امریکی ڈالر ہے۔

• میزان بینک لمیٹڈ (ایم ای بی ایل)

میزان بینک لمیٹڈ پاکستان کا پہلا اور سب سے بڑا اسلامی بینک ہے، جو 1997 میں ایک پبلک لمیٹڈ کمپنی کے طور پر قائم ہوا۔

بینک نے 2002 میں اسٹیٹ بینک آف پاکستان سے پہلا اسلامی کمرشل بینکنگ لائسنس حاصل کرنے کے بعد باضابطہ طور پر اپنے آپریشنز کا آغاز کیا۔ اس وقت میزان بینک کارپوریٹ، کمرشل، کنزیومر، انویسٹمنٹ اور ریٹیل بینکنگ کی خدمات انجام دے رہا ہے۔

میزان بینک لمیٹڈ کی ویب سائٹ پر دستیاب معلومات کے مطابق، بینک کے پاس ملک بھر میں 1,000 سے زائد برانچز پر مشتمل ریٹیل بینکنگ نیٹ ورک ہے۔ اس نیٹ ورک کو 950 سے زیادہ اے ٹی ایم مشینوں، ویزا اور ماسٹر کارڈ ڈیبٹ کارڈز، کال سینٹر، انٹرنیٹ بینکنگ، موبائل ایپلیکیشن اور ایس ایم ایس بینکنگ جیسی سہولیات کا بھرپور تعاون حاصل ہے۔

پاکستان اسٹاک ایکسچینج (پی ایس ایکس) پر میزان بینک کی مارکیٹ کیپیٹلائزیشن اس وقت 2.29 ارب امریکی ڈالر ہے۔

• فوجی فرٹیلائزر کمپنی لمیٹڈ (ایف ایف سی)

فوجی فرٹیلائزر کمپنی لمیٹڈ پاکستان میں ایک پبلک لمیٹڈ کمپنی کے طور پر رجسٹرڈ ہے۔ یہ کمپنی کھاد اور کیمیکلز کی تیاری، خرید و فروخت اور مارکیٹنگ کے شعبے میں کام کرتی ہے۔ اس کے علاوہ کمپنی دیگر شعبوں جیسے کہ کھاد، کیمیکلز، سیمنٹ، فوڈ پروسیسنگ، توانائی کی پیداوار اور بینکاری میں سرمایہ کاری بھی کرتی ہے۔

31 دسمبر 2024 تک ایف ایف سی کے کل 1,423.109 ملین جاری کردہ شیئرز ہیں، جن کے 29,400 شیئر ہولڈرز ہیں۔ کمپنی میں سب سے بڑا حصہ فوجی فاؤنڈیشن کی کمیٹی آف ایڈمن (متعلقہ ادارے، ذیلی ادارے اور وابستہ فریقین) کا ہے، جو 43.51 فیصد حصص کی مالک ہے۔ اس کے بعد مقامی عوام کی ملکیت 25.06 فیصد ہے۔

سرکاری شعبے کی کمپنیاں اور کارپوریشنزایف ایف سی کے 9.62 فیصد حصص رکھتی ہیں، جبکہ بینک، ڈی ایف آئیز، این بی ایف آئیز، انشورنس، پنشن فنڈز، تکافل اور مضاربہ ادارے مجموعی طور پر 9.02 فیصد حصص کے مالک ہیں۔ غیر ملکی کمپنیوں کے پاس ایف ایف سی کے 2.39 فیصد حصص ہیں، جبکہ باقی حصص دیگر اقسام کے شیئر ہولڈرز کے پاس ہیں۔

پاکستان اسٹاک ایکسچینج (پی ایس ایکس) پر ایف ایف سی کی موجودہ مارکیٹ کیپیٹلائزیشن 2.05 ارب امریکی ڈالر ہے۔

دیگر کمپنیوں کا جائزہ:پی ایس ایکس میں متعدد دیگر لسٹڈ کمپنیاں ایسی ہیں جن کی مارکیٹ کیپیٹلائزیشن 1 ارب ڈالر سے زائد ہے، ان میںلکی سیمنٹ (لگی)پاکستان پیٹرولیم لمیٹڈ (پی پی ایل)ایم سی بی بینک لمیٹڈ (ایم سی بی)کولگیٹ پامولیو پاکستان (سی او ایل جی)نیسلے پاکستان (نیسلے) شامل ہیں۔

مارکیٹ کیپیٹلائزیشن کا یہ حساب پیر، 7 جولائی 2025، صبح 10 بجے کے اعداد و شمار کے مطابق کیا گیا ہے۔

اس حساب میں روپے کے مقابلے میں 1 امریکی ڈالر کی شرح تبادلہ 283 روپے رکھی گئی ہے۔