ترمیم شدہ فنانس بل (2025-26) کے تحت فیڈرل بورڈ آف ریونیو (ایف بی آر) کو پابند کیا گیا ہے کہ وہ ایک تین رکنی کمیٹی تشکیل دے جو ٹیکس فراڈ میں ملوث کسی شخص کے خلاف وارنٹ گرفتاری جاری کرنے کیلئے کمشنر کو اجازت دے، بشرطیکہ ٹیکس نقصان 5 کروڑ روپے سے زائد ہو۔
سیلز ٹیکس ایکٹ 1990 کی شق 37A کے تحت ایسے ٹیکس فراڈ کے مقدمات جن میں رقم 5 کروڑ روپے سے کم ہو، اس مخصوص صورت حال میں ایف بی آر کی کمیٹی کے ذریعے گرفتاری کے قابل نہیں ہوں گے۔
گرفتاری اس صورت میں عمل میں لائی جائے گی جب ملزم جان بوجھ کر تین نوٹسز کے باوجود تفتیش میں شامل نہ ہورہا ہو یا فرار ہونے کی کوشش کررہا ہو، یا ایسے معقول شواہد موجود ہوں کہ ملزم ثبوتوں میں رد و بدل کرسکتا ہے۔
ترمیم شدہ فنانس بل (2025-26) کے مطابق ایف بی آر نے سیلز ٹیکس ایکٹ کے تحت قابلِ سزا جرائم کی تفتیش اور گرفتاری سے متعلق شق 37 اے (اختیارات برائے تفتیش و گرفتاری) کو دوبارہ مرتب کردیا ہے۔
(1) اس ایکٹ کی دفعہ 11ای کے کسی بھی مندرجات کے باوجود، ان لینڈ ریونیو کا کوئی افسر، جو اسسٹنٹ کمشنر کے درجے سے کم نہ ہو، یا وہ کوئی اور افسر جسے بورڈ اس مقصد کے لیے مجاز قرار دے، اگر اس کے پاس ٹیکس فراڈ یا اس ایکٹ کے تحت قابلِ تعزیر جرم کے ارتکاب کے واضح شواہد موجود ہوں، تو وہ کمشنر کی منظوری سے انکوائری کا آغاز کر سکتا ہے۔
(2) اس ایکٹ کے تحت انکوائری کے مقصد کے لیے ان لینڈ ریونیو کے افسر کو مقدمات کی سماعت کرنے والی سول عدالت کے اختیارات حاصل ہوں گے، جیسا کہ کوڈ آف سول پروسیڈیور 1908 )ایکٹ نمبر V آف 1908) میں دیا گیا ہے، جن میں درج ذیل امور شامل ہوں گے:(الف) کسی بھی شخص کو طلب کرنے، اس کی حاضری یقینی بنانے اور اسے حلف پر بیان دینے کے لیے طلب کرنا؛(ب) دستاویزات کی تلاش اور پیشی کا مطالبہ کرنا، اور حلف نامے کے ذریعے شواہد حاصل کرنا۔
(3) انکوائری افسر متعلقہ دفعات جیسے شق 37، 38، 38A، 38B، 40 یا اس ایکٹ کی کسی اور شق کے تحت اپنے اختیارات استعمال کرتے ہوئے انکوائری کو جہاں ضروری ہو، 6 ماہ کے اندر مکمل کرے گا۔
(4) انکوائری کے دوران، انکوائری افسر اس شخص کو سننے کا موقع دے گا جس پر اس ایکٹ کے تحت ٹیکس فراڈ کا الزام ہے، اور اس شخص کو ٹیکس فراڈ کی تفصیلات سے آگاہ کرتے ہوئے وضاحت طلب کرے گا کہ اس نے کس طرح ٹیکس فراڈ کیا یا کروایا۔
(5) انکوائری افسر تحقیقات کے لیے پیشگی منظوری حاصل کرنے یا انکوائری بغیر مزید تحقیقات کے بند کرنے کے لیے انکوائری رپورٹ، جس میں وجوہات اور اس انکوائری کے نتیجے میں حساب کیا گیا ٹیکس کا نقصان شامل ہوگا، کمشنر کے سامنے پیش کرے گا۔
(6) کمشنر، ذیلی دفعہ (5) کے تحت موصول ہونے والی انکوائری رپورٹ کی بنیاد پر اور تحریری وجوہات درج کرنے کے بعد، درج ذیل میں سے کوئی ایک کارروائی کرے گا—(i) تحقیقات شروع کرنے کی منظوری دے، یا(ii) ان لینڈ ریونیو کے افسر سے مزید معلومات یا دستاویزات طلب کرے جو وہ فیصلہ کرنے کے لیے ضروری سمجھے؛ یا(iii) رپورٹ کو مسترد یا قبول کرتے ہوئے انکوائری کو بند کر دے، جیسا کہ معاملہ ہو۔ شرط ہے کہ رپورٹ کی ایک کاپی اس شخص کو فراہم کی جائے جس پر ٹیکس فراڈ کا الزام ہے۔
(7) ذیلی دفعہ (6) کے تحت تحقیقات کی منظوری کے بعد، انکوائری افسر تین ماہ کے اندر اندر تحقیقات مکمل کرے گا اور تحقیقاتی رپورٹ تیار کر کے متعلقہ عدالت میں پیش کرے گا۔
(8) بورڈ، چیئرمین کی طرف سے نوٹیفائی کردہ تین رکنی کمیٹی کے ذریعے، کمشنر کو گرفتاری کا وارنٹ جاری کرنے کا اختیار دے سکتا ہے اگر فراڈ مندرجہ ذیل ذیلی شقوں (a)، (b)، (c)، (d)، (e)، اور (f) کے تحت آتا ہو اور تحقیقات کے دوران ٹیکس نقصان 5 کروڑ روپے سے تجاوز کر جائے، بشرطیکہ:(8) بورڈ، چیئرمین کی طرف سے نوٹیفائی کردہ تین رکنی کمیٹی کے ذریعے، کمشنر کو گرفتاری کا وارنٹ جاری کرنے کا اختیار دے سکتا ہے اگر فراڈ مندرجہ ذیل ذیلی شقوں (a)، (b)، (c)، (d)، (e)، اور (f) کے تحت آتا ہو اور تحقیقات کے دوران ٹیکس نقصان 5 کروڑ روپے سے تجاوز کر جائے، بشرطیکہ:(i) ملزم جان بوجھ کر یا ارادی طور پر تین نوٹسز کے باوجود تحقیقات میں حصہ نہیں لے رہا ہو؛(ii) ملزم فرار ہونے کی کوشش کر رہا ہو؛(iii) ایسے معقول وجوہات موجود ہوں جن سے ظاہر ہو کہ ملزم شواہد میں چھیڑ چھاڑ کرسکتا ہے۔
(9) ان لینڈ ریونیو کا افسر،اس خصوصی جج سے گرفتاری کا وارنٹ حاصل کرنے کے بعد، اس صورت میں گرفتاری کرسکتا ہے جب فراڈ سیکشن 2 کی شق (37) کی ذیلی شقوں میں آتا ہو لیکن اس سیکشن کی ذیلی دفعہ (8) میں بیان کردہ شرائط کے علاوہ ہو، بشرطیکہ:(i) ملزم جان بوجھ کر تین نوٹسز کے باوجود تحقیقات میں شامل نہ ہو؛(ii) ملزم فرار ہونے کی کوشش کر رہا ہو؛(iii) ایسے معقول شواہد موجود ہوں کہ ملزم ثبوتوں میں رد و بدل کر سکتا ہے۔
(10) اگر اس ایکٹ کے تحت ٹیکس فراڈ یا قابلِ تعزیر جرم کا شبہ کسی کمپنی پر ہو تو اس کمپنی کا ہر وہ ڈائریکٹر یا افسر جس کے بارے میں مجاز افسر کو یہ معلوم ہوں کہ وہ کمپنی کے ایسے اقدامات کا ذاتی طور پر ذمہ دار ہے جو ٹیکس فراڈ یا قابلِ تعزیر جرم میں شامل ہیں، اسے گرفتاری کا سامنا کرنا پڑے گا؛ بشرطیکہ اس ذیلی دفعہ کے تحت کسی بھی گرفتاری سے کمپنی کو اس ایکٹ کے تحت عائد ٹیکس، جرمانے اور ڈیفالٹ سرچارج کی ادائیگی کی ذمہ داری سے مستثنیٰ نہیں کیا جائے گا۔
(11) اس ایکٹ کی کسی بھی شق کے برعکس، اگر کوئی شخص ٹیکس فراڈ یا اس ایکٹ کے تحت قابلِ تعزیر جرم کا مرتکب ہوا ہو تو کمشنر، انکوائری یا تحقیقات سے پہلے یا بعد، اس جرم کو معاف کر سکتا ہے بشرطیکہ وہ شخص انکوائری یا تحقیقات کے دوران مقرر شدہ ٹیکس کی بچت کی گئی رقم کے ساتھ ڈیفالٹ سرچارج اور جرمانہ ادا کرے جو اس ایکٹ کے تحت لازم ہے۔
(12) اس ایکٹ کے تحت گرفتار کیے جانے والے کسی بھی ملزم کو گرفتاری کے وقت تحریری طور پر ان وجوہات سے آگاہ کیا جائے گا جن کی بنیاد پر اسے گرفتار کیا گیا ہے۔
(13) اس ایکٹ کے تحت کی جانے والی تمام گرفتاریاں متعلقہ دفعات کے مطابق کوڈ آف کرنمل پروسیڈیور 1898 (ایکٹ V آف 1898) کے تحت عمل میں لائی جائیں گی، جس میں گرفتاری کے نئے ضابطہ کار کو شامل کیا گیا ہے۔
کاپی رائٹ بزنس ریکارڈر 2025