جاپانی حکومت نے اقتصادی اور سماجی ترقیاتی پروگرام کے تحت بدھ کے روز فیصل آباد میں بہتر فراہمی آب سے متعلق بہتر اسمارٹ واٹر میٹرز کی فراہمی کے لیے 510 ملین جاپانی ین (3.5 ملین ڈالر) کی رقم کی منظوری دے دی۔
وزارت اقتصادی امور کے جاری کردہ ایک پریس ریلیز کے مطابق فیصل آباد میں تقریباً 8,000 اسمارٹ واٹر میٹرز کی تنصیب نہ صرف پانی کے استعمال اور تقسیم کی کارکردگی کو بڑھائے گی، بلکہ یہ ڈیمانڈ مینجمنٹ کی بہتری، پانی کے وسائل کی بچت اور فیصل آباد واٹر اینڈ سینیٹیشن ایجنسی کو مالی اعتبار سے بھی مدد فراہم کرے گی۔
بیان میں کہا گیا کہ یہ گرانٹ حکومت کے بہتر شہری حکمرانی اور ماحولیاتی پائیداری کے وژن کے مطابق ہے اور ہمیں یقین ہے کہ یہ دیگر شہروں میں بھی نمونے کے طور پر اپنایا جائے گا۔
وزارت اقتصادی امور کے سیکرٹری ڈاکٹر قازم نیاز اور پاکستان میں جاپان کے سفیر اکاماتو شیوچی نے اپنی حکومتوں کی جانب سے دستخط کیے اور دستاویز کا تبادلہ کیا۔
ڈاکٹر قازم نیاز نے جاپان کا شکریہ ادا کرتے ہوئے اس بات کی یقین دہانی کرائی کہ پروجیکٹ کی کامیاب تکمیل کے لیے تمام ضروری معاونت فراہم کی جائے گی اور دونوں فریقوں کے درمیان مزید بامعنی تعاون بڑھایا جائے گا۔
اس کے علاوہ شیوچی نے اپنی حکومت کی جانب سے پاکستان کے ساتھ قریبی تعاون کے عزم کا اعادہ کرتے ہوئے دوستانہ تعلقات اور دوطرفہ تعاون کو مزید مضبوط کرنے کے لیے بھی عزم ظاہر کیا۔