ازبکستان پاکستان کے ساتھ سیاسی تعلقات کو اقتصادی ترقی میں تبدیل کیلئے پرعزم

ازبکستان پاکستان کے ساتھ بہترین سیاسی تعلقات کو باہمی فائدہ مند اقتصادی تعلقات میں تبدیل کرنے کے لئے مکمل طور پر پرعزم ہے۔

یہ بات ازبکستان کے سفیر علیشیر توختیف نے وزیراعظم ہاؤس میں وزیراعظم شہباز شریف سے ملاقات کے دوران کہی۔

وزیر اعظم کے دفتر (پی ایم او) کی جانب سے جاری بیان کے مطابق وزیراعظم نے سفیر کے توسط سے ازبکستان کے صدر عزت مآب شوکت میرزییوئیف کو مبارکباد پیش کی اور گزشتہ ماہ تاشقند کے حالیہ دورے کے دوران ان کے اور ان کے وفد کی گرم جوشی اور مہمان نوازی پر تہہ دل سے شکریہ ادا کیا۔

ملاقات کے دوران وزیراعظم نے اپنے دورے کے دوران دونوں ممالک کے درمیان ہونے والی شاندار پیش رفت پر مکمل اطمینان کا اظہار کیا۔

وزیر اعظم نے کہا کہ تاشقند سے واپسی پر انہوں نے متعلقہ شعبوں کے متعلقہ وزرا کو ٹاسک دیا ہے کہ وہ دونوں رہنماؤں کے فیصلوں پر فوری عمل درآمد کو یقینی بنائیں۔

انہوں نے خاص طور پر ازبکستان کے ساتھ کان کنی اور معدنیات، ریلوے (بشمول ٹرانس افغان ریلوے منصوبہ)، ایس ای زیڈز، بینکنگ، سیاحت، ثقافت اور قابل تجدید توانائی کے شعبوں میں تعاون بڑھانے میں پاکستان کی دلچسپی کو اجاگر کیا۔

انہوں نے دوطرفہ تجارت کو 2 ارب ڈالر تک بڑھانے کے لئے روڈ میپ تیار کرنے کی ضرورت پر زور دیا، جیسا کہ دونوں رہنماؤں کے درمیان اتفاق کیا گیا تھا۔

ازبکستان کے سفیر نے کہا کہ صدر میرزییوئیف پاکستان کے ساتھ ازبکستان کے تعلقات کو مضبوط بنانے اور دونوں ممالک کے درمیان بہترین سیاسی تعلقات کو باہمی فائدے مند اقتصادی تعلقات میں تبدیل کرنے کے لئے مکمل طور پر پرعزم ہیں۔

انہوں نے یہ بھی بتایا کہ صدر میرزیوئیف نے اس سال کے آخر میں پاکستان کا سرکاری دورہ کرنے کی وزیر اعظم کی دعوت قبول کر لی ہے، جس کے لئے دونوں فریقوں کے درمیان طے شدہ تاریخوں پر کام کیا جائے گا۔