سندھ ہائی کورٹ نے جسٹس جہانگیری کی قانون کی ڈگری منسوخ کرنے کا فیصلہ کالعدم قرار دے دیا

سندھ ہائی کورٹ نے اسلام آباد ہائی کورٹ کے جسٹس طارق محمود جہانگیری کی قانون کی ڈگری منسوخ کرنے کا کراچی یونیورسٹی کا فیصلہ کالعدم قرار دے دیا۔

بزنس ریکارڈر کے پاس موجود تحریری حکم میں عدالت نے فیصلہ دیا کہ جامعہ کراچی کی سنڈیکیٹ اینڈ انفیئر مینز کمیٹی نے متاثرہ فریق کو سنے بغیر ڈگری منسوخ کردی جو آئین کے آرٹیکل 10 اے (منصفانہ ٹرائل کا حق) کی صریح خلاف ورزی ہے۔

عدالت نے کہا کہ بدقسمتی سے جسٹس طارق محمود جہانگیری کو سماعت کا کوئی موقع نہیں دیا گیا اور اس طرح کا طریقہ انتہائی قابل اعتراض اور غیر قانونی معلوم ہوتا ہے۔ اور یہ قانونی اختیار کے بغیر ہے.

سندھ ہائی کورٹ میں دائر درخواست میں موقف اختیار کیا گیا ہے کہ اسلام آباد ہائی کورٹ کے معزز جج جسٹس جہانگیری کی ساکھ کو نقصان پہنچانے کے منصوبے کے تحت انہیں انتہائی بدنیتی سے نشانہ بنایا گیا۔

جسٹس جہانگیری اسلام آباد ہائی کورٹ کے ان 6 ججز میں شامل ہیں جنہوں نے 25 مارچ کو سپریم جوڈیشل کونسل کو خط لکھ کر عدالتی معاملات میں انٹیلی جنس ایجنسیوں کی مداخلت پر رہنمائی طلب کی تھی۔

یہ تنازعہ جولائی میں اس وقت شروع ہوا جب جامعہ کراچی کے کنٹرولر امتحانات کی جانب سے جسٹس جہانگیری کی قانون کی ڈگری کے حوالے سے ایک خط سوشل میڈیا پر وائرل ہوا۔

اس کے فوری بعد اسلام آباد ہائی کورٹ نے جج کے خلاف ’بدنامی مہم‘ کا نوٹس لیا اور متعدد صحافیوں اور سوشل میڈیا کارکنوں کو نوٹس جاری کیے گئے۔

انہوں نے سندھ ٹرانسپیرنسی رائٹ ٹو انفارمیشن ایکٹ 2016 کے تحت ڈگری کے بارے میں معلومات طلب کرنے والی درخواست پر جامعہ کراچی کا ایک خط اور ضمیمہ شیئر کیا تھا۔

عدالت نے پاکستان الیکٹرانک میڈیا ریگولیٹری اتھارٹی (پیمرا)، پاکستان ٹیلی کمیونیکیشن اتھارٹی (پی ٹی اے) اور وفاقی تحقیقاتی ایجنسی (ایف آئی اے) کے ڈائریکٹر جنرل کو بھی نوٹس جاری کیے تھے۔

یہ معاملہ اس وقت پھر سامنے آیا جب کراچی یونیورسٹی کے سنڈیکیٹ نے ہفتہ کے روز اپنی غیر منصفانہ ذرائع (یو ایف ایم) کمیٹی کی سفارش پر ایک امیدوار کی ڈگری اور اندراج منسوخ کر دیا، جس کے بارے میں کہا جاتا ہے کہ وہ جسٹس جہانگیری ہیں۔

یہ فیصلہ اکیڈمک اینڈ سنڈیکیٹ ممبر ڈاکٹر ریاض احمد کی کئی گھنٹوں کی طویل حراست کے بعد کیا گیا ہے۔

ریاض احمد نے الزام عائد کیا کہ یہ اقدام انہیں سنڈیکیٹ کے اہم اجلاس میں شرکت سے روکنے کی کوشش ہے جہاں انہوں نے کہا کہ اسلام آباد ہائی کورٹ کے جج کی ڈگری پر تبادلہ خیال کیا جانا ہے۔ پولیس نے ہفتہ کے روز حراست کو تسلیم کرنے سے گریز کرتے ہوئے کہا کہ ریاض احمد کو 2017 کے ایک معاملے میں گرفتار کیا گیا تھا لیکن الجھن دور ہونے کے بعد انہیں چھوڑ دیا گیا تھا۔