حکومت صنعتوں کے فروغ کے لیے عملی اقدامات کرے، صدر یو بی جی
- کاروباری برادری کو ایس ایم تنویر کی قیادت پر مکمل اعتماد ہے، زبیر طفیل
یونائیٹڈ بزنس گروپ (یو بی جی) کے صدر زبیر طفیل نے کہا ہے کہ حکومت صنعت و تجارت کے فروغ کیلئے عملی اقدامات کرے تاکہ ملکی معیشت کو پائیدار بنیادوں پر استوار کیا جاسکے۔
انہوں نے زور دیا کہ فیڈریشن میں کاروباری برادری کی مضبوط نمائندگی سے حکومت کو معاشی پالیسیوں کے تسلسل، صنعتی ترقی، سرمایہ کاری میں اضافے اور کاروبار کے لیے سازگار ماحول کی تشکیل کے حوالے سے مثبت تجاویز دینے میں مدد ملے گی۔
انہوں نے کہا کہ پاکستان کو مضبوط اور مستحکم معیشت کی جانب گامزن کرنے اور حکومت کو کاروباری برادری کی جانب سے عملی اور مؤثر تجاویز کی فراہمی یقینی بنانے کے لیے ایس ایم تنویر کی ایف پی سی سی آئی انتخابات میں بھاری اکثریت سے کامیابی ضروری ہے۔
ایف پی سی سی آئی کے آئندہ 2027-28 کے انتخابات پر تبصرہ کرتے ہوئے انہوں نے کہا کہ کاروباری برادری کو ایس ایم تنویر کی قیادت پر مکمل اعتماد ہے اور انہیں مختلف تجارتی و صنعتی حلقوں کی بھرپور حمایت حاصل ہے۔
انہوں نے اس اعتماد کا اظہار کیا کہ یو بی جی کے صدارتی امیدوار ایس ایم تنویر ایف پی سی سی آئی انتخابات میں بھاری اکثریت سے کامیابی حاصل کریں گے۔
انہوں نے مزید کہا کہ یو بی جی کی قیادت اور اس کا پینل کاروباری برادری کو درپیش مسائل کے حل اور تاجروصنعتکاروں کی مؤثر نمائندگی یقینی بنانے کیلئے پُرعزم ہے۔
زبیر طفیل نے مزید کہا کہ کاروباری برادری پاکستان کی معاشی ترقی میں اہم کردار ادا کرتی ہے۔ ان کا کہنا تھا کہ حکومت اور نجی شعبے کے درمیان مؤثر رابطے اور مشاورت کے ذریعے معاشی چیلنجز سے نمٹا جاسکتا ہے، جبکہ یونائیٹڈ بزنس گروپ اس سلسلے میں تعمیری کردار ادا کر رہا ہے۔
تاہم انہوں نے زور دیا کہ ملک میں مقامی اور غیر ملکی سرمایہ کاری کی حوصلہ افزائی کے لیے کاروبار دوست پالیسیوں کو ترجیح دی جانی چاہیے۔
انہوں نے اس عزم کا اظہار کیا کہ پاکستان کی معیشت کی بہتری اور پائیدار معاشی ترقی کے حصول کے لیے تمام متعلقہ فریقوں کو مل کر کام کرنا ہوگا۔


Comments