پیٹرول، ڈیزل کی قیمتوں میں 2، 2 روپے فی لیٹر کمی
- نئی قیمتوں کا اطلاق 17 نومبر کیلئے ہوگا
حکومت نے پیٹرول اور ہائی اسپیڈ ڈیزل (ایچ ایس ڈی) کی قیمتوں میں فی لیٹر 2، 2 روپے کمی کر دی ہے، جس کے بعد پیٹرول کی نئی قیمت 328 روپے اور ڈیزل کی 358 روپے فی لیٹر مقرر ہو گئی ہے۔ نئی قیمتوں کا اطلاق 17 نومبر 2026 کیلئے ہوگا۔
آئل اینڈ گیس ریگولیٹری اتھارٹی (اوگرا) نے پیر کے روز جاری کردہ نوٹیفکیشن میں نئی ایکس ڈپو قیمتوں کا اعلان کیا۔ اتھارٹی کے مطابق قیمتوں کا تعین وفاقی حکومت کے منظور کردہ پیٹرولیم مصنوعات کی قیمتوں کے طریقہ کار کے تحت کیا گیا ہے۔

نئی قیمتوں کے مطابق پیٹرول (موٹر اسپرٹ) کی قیمت 330 روپے سے کم ہو کر 328 روپے فی لیٹر ہو گئی ہے، جبکہ ہائی اسپیڈ ڈیزل کی قیمت بھی 360 روپے سے گھٹا کر 358 روپے فی لیٹر مقرر کی گئی ہے۔
نئی قیمتوں کا اطلاق 17 نومبر کیلئے ہوگا۔
جمعہ کے روز حکومت نے پیٹرول کی قیمت میں 2 روپے فی لیٹر کمی کر کے 330 روپے مقرر کی تھی، جبکہ ہائی اسپیڈ ڈیزل کی قیمت 360 روپے فی لیٹر برقرار رکھی تھی۔
عالمی منڈی میں پیر کے روز تیل کی قیمتوں میں تقریباً ایک فیصد کمی ریکارڈ کی گئی۔ آبنائے ہرمز کے راستے تیل کی ترسیل بحال ہونے کے آثار سے رسد میں اضافے کی توقعات مضبوط ہوئیں، تاہم ٹینکروں پر تازہ حملوں کے واقعات نے مشرق وسطیٰ سے تیل کی برآمدات کو لاحق خطرات برقرار رکھے۔
برینٹ خام تیل کے مستقبل کے سودے 1.06 ڈالر یا 1.1 فیصد کمی کے بعد 94.78 ڈالر فی بیرل پر آگئے، جبکہ امریکی ویسٹ ٹیکساس انٹرمیڈیٹ (ڈبلیو ٹی آئی) خام تیل کی قیمت 65 سینٹ یا 0.7 فیصد گھٹ کر 87.91 ڈالر فی بیرل ہو گئی۔


Comments