ٹرمپ کی پاکستان میں امریکی سفیر کے لیے نامزد امیدوار نٹالی بیکر کے بارے میں جاننے کی اہم باتیں

امریکی صدر ڈونلڈ ٹرمپ نے کیریئر سفارت کار نٹالی بیکر کو پاکستان میں امریکا کی نئی سفیر نامزد کیا ہے، جس سے ملک میں امریکا کے اعلیٰ ترین سفارتی عہدے پر تقریباً دو سال سے جاری تعطل ختم ہونے کی توقع ہے۔

لیکن نٹالی بیکر کون ہیں؟ اسلام آباد آنے سے پہلے وہ کن اہم سفارتی ذمہ داریوں پر فائز رہیں اور پاکستان کے بارے میں ان کا تجربہ کتنا ہے؟

اس سفارت کار کے بارے میں جاننے کے لیے چند اہم باتیں درج ذیل ہیں۔

1۔ وہ پہلے ہی پاکستان میں امریکی سفارتی مشن کی سربراہی کر رہی ہیں.

نٹالی بیکر اسلام آباد کے لیے کوئی نیا چہرہ نہیں ہیں۔ وہ اگست 2024ء میں امریکی سفارت خانے میں نائب چیف آف مشن کی حیثیت سے پاکستان آئیں اور جنوری 2025ء میں امریکی سفیر ڈونلڈ بلوم کی روانگی کے بعد ناظم الامور کی ذمہ داریاں سنبھال لیں۔

ناظم الامور اس سفارت کار کو کہا جاتا ہے جو باقاعدہ سفیر کی عدم موجودگی میں سفارت خانے کے اعلیٰ ترین عہدیدار کی حیثیت سے اس کے امور چلاتا ہے۔ اگر امریکی سینیٹ ان کی نامزدگی کی توثیق کر دیتی ہے تو بیکر پاکستان میں واشنگٹن کی اگلی مستقل سفیر بن جائیں گی۔

2۔ لیبیا میں انقلاب کے وقت وہ وہاں تعینات تھیں

نٹالی بیکر کے سفارتی کیریئر کا ایک اہم اور غیر معمولی مرحلہ 2009ء سے 2011ء کے دوران لیبیا میں ان کی تعیناتی تھی۔

اس عرصے میں انہوں نے سیاسی و اقتصادی مشیر کی حیثیت سے خدمات انجام دیں، جب واشنگٹن تقریباً تین دہائیوں سے کشیدہ تعلقات کے بعد لیبیا کے ساتھ تعلقات معمول پر لانے کی کوشش کر رہا تھا۔

وہ فروری 2011ء میں لیبیا کے انقلاب کے باعث امریکی سفارت خانے کے انخلا تک وہاں تعینات رہیں۔ اس طرح انہیں ملک کی تاریخ کے ایک اہم موڑ پر سفارتی ذمہ داریاں انجام دینے کا تجربہ حاصل ہوا۔

3۔ عراق سے امریکی فوج کے انخلا میں معاونت کی

کویت میں امریکی سفارت خانے میں اقتصادی مشیر کی حیثیت سے تعیناتی کے دوران نٹالی بیکر نے عراق سے امریکی فوج کے انخلا میں معاونت کے لیے امریکی محکمہ دفاع کے ساتھ کام کیا۔

ان کے سفارتی تجربے میں دبئی میں امریکی قونصل خانے کے ایران ریجنل پریزنس آفس میں نائب ڈائریکٹر اور امریکی محکمہ خارجہ کے دفتر برائے شمالی افریقی امور میں خدمات بھی شامل ہیں۔

4۔ پرنسٹن اور ہارورڈ یونیورسٹیوں سے فارغ التحصیل ہیں

نٹالی بیکر نے پرنسٹن یونیورسٹی سے بیچلر ڈگری حاصل کی، جبکہ ہارورڈ یونیورسٹی سے پبلک پالیسی میں ماسٹرز کیا۔

وہ نیشنل ڈیفنس یونیورسٹی کے نیشنل وار کالج کی 2017ء کی ممتاز فارغ التحصیل بھی ہیں۔ ان کا شمار امریکی سینئر فارن سروس کے کیریئر سفارت کاروں میں ہوتا ہے اور وہ منسٹر کونسلر کے عہدے پر فائز ہیں۔

5۔ کرکٹ میں دلچسپی لے رہی ہیں، تاہم ابھی کھیل کو پوری طرح سمجھ نہیں پائیں.

پاکستان آمد کے بعد نٹالی بیکر نے کرکٹ میں دلچسپی لینا شروع کی ہے، تاہم ان کا کہنا ہے کہ اس کھیل کے قواعد قدرے پیچیدہ ہیں۔

جون 2026ء میں امریکی سفارت خانے کی جانب سے شیئر کیے گئے ایک انٹرویو میں انہوں نے میچ دیکھنے، پاکستان کی قومی کرکٹ ٹیم کی حوصلہ افزائی کرنے اور لاہور میں خواتین کرکٹرز کے ساتھ خود کرکٹ کھیلنے کے تجربات کا ذکر کیا۔

6۔ پاکستانی کھانوں نے انہیں خاصا متاثر کیا ہے

نٹالی بیکر پاکستانی کھانوں کی بھی شوقین ہو گئی ہیں۔ ان کے پسندیدہ کھانوں میں پالک پنیر اور دال شامل ہیں، جبکہ چائے، پکوڑوں اور پاکستانی مٹھائیوں نے بھی انہیں اپنا گرویدہ بنا لیا ہے۔

وہ پاکستانی شادیوں کی تقریبات میں بھی خاصی دلچسپی رکھتی ہیں۔ ان کے مطابق مہندی، بارات اور ولیمے سمیت کئی روز تک جاری رہنے والی شادی کی تقریبات ان کے لیے یادگار تجربات ہیں۔

تاہم وہ اپنے آبائی علاقے ٹیکساس کے کھانوں کو بھی نہیں بھولی ہیں۔ امریکی کھانوں کے بارے میں پوچھے جانے پر انہوں نے اپنے آبائی شہر سان انتونیو کے ناشتے میں پیش کیے جانے والے ٹیکوز اور ٹیکساس کے مخصوص انداز میں تیار کردہ باربی کیو کی سفارش کی۔

7۔ پاکستان کے علاوہ دیگر ممالک میں بھی سفارتی خدمات انجام دے چکی ہیں

اسلام آباد آنے سے پہلے نٹالی بیکر اگست 2021ء سے جولائی 2024ء تک قطر کے دارالحکومت دوحہ میں امریکی سفارت خانے کی نائب چیف آف مشن تھیں۔

ان کی سابقہ سفارتی تعیناتیوں میں لیبیا، کویت، دبئی اور ترکمانستان بھی شامل ہیں۔ وہ اس سے قبل اسلام آباد میں قونصلر افسر کی حیثیت سے بھی خدمات انجام دے چکی ہیں، جس کا مطلب ہے کہ پاکستان سے ان کا سفارتی تعلق موجودہ تعیناتی سے بھی پہلے کا ہے۔

آگے کیا ہوگا؟

نٹالی بیکر کی نامزدگی ایسے وقت سامنے آئی ہے جب پاکستان اور امریکا کے درمیان تجارت، سرمایہ کاری، سلامتی اور علاقائی امور پر سفارتی روابط جاری ہیں۔ وہ پہلے ہی پاکستانی حکام کے ساتھ سفارتی روابط اور اقتصادی تعاون سے متعلق بات چیت میں شریک رہی ہیں۔

تاہم ٹرمپ کی جانب سے نامزدگی کا اعلان تقرری کے عمل کا محض آغاز ہے۔ سفیر کا باضابطہ عہدہ سنبھالنے سے پہلے نٹالی بیکر کو امریکی سینیٹ کے غور و خوض اور توثیق کے مراحل سے گزرنا ہوگا۔