ترسیلاتِ زر اب پاکستان کے پورے بیرونی خسارے کو پورا کرنے کے لیے کافی ہیں، تجزیہ کار

بیرون ملک مقیم پاکستانیوں کی جانب سے بھیجی جانے والی ترسیلاتِ زر اب ملک کے 100 فیصد بیرونی خسارے کو پورا کر رہی ہیں اور مجموعی قومی پیداوار (جی ڈی پی) کا تقریباً 10 فیصد ہیں۔ یہ بات ایسٹ کیپیٹل کے ہیڈ آف فرنٹیئر مارکیٹس اور پورٹ فولیو ایڈوائزر، تجزیہ کار ایمرے اکچکماک نے کہی۔ انہوں نے 2023 میں پاکستان کے ڈیفالٹ کے قریب پہنچنے کے بعد معیشت کو مستحکم کرنے میں بیرون ملک مقیم پاکستانیوں کے مرکزی کردار کو اجاگر کیا۔

اکچکماک نے سوشل میڈیا پلیٹ فارم ایکس پر اپنی ایک پوسٹ میں کہا کہ گزشتہ 12 ماہ کے دوران ترسیلاتِ زر کا حجم 44 ارب ڈالر تک پہنچ گیا ہے اور اس میں مسلسل اضافہ ہو رہا ہے۔ اب یہ پاکستان کے 100 فیصد بیرونی خسارے کو پورا کر رہی ہیں اور جی ڈی پی کا 10 فیصد بنتی ہیں، جو دنیا میں بلند ترین شرحوں میں سے ایک ہے۔

انہوں نے مزید کہا کہ بیرون ملک مقیم تقریباً ایک کروڑ پاکستانیوں کی ترسیلاتِ زر نہ ہوتیں تو ملکی معیشت کی صورتحال یقیناً بالکل مختلف ہوتی۔

اسٹیٹ بینک آف پاکستان (ایس بی پی) کی جانب سے منگل کو جاری کردہ اعداد و شمار بھی ترسیلاتِ زر میں اضافے کے رجحان کی بڑی حد تک تصدیق کرتے ہیں۔ اسٹیٹ بینک کے مطابق اکتوبر میں بیرون ملک مقیم پاکستانیوں نے 3.9 ارب ڈالر کی ترسیلاتِ زر بھیجیں، جو گزشتہ سال اسی ماہ کے 3.42 ارب ڈالر کے مقابلے میں 14 فیصد زیادہ ہیں۔

ستمبر میں موصول ہونے والی 3.6 ارب ڈالر کی ترسیلاتِ زر کے مقابلے میں اکتوبر کے دوران ان میں 8.5 فیصد اضافہ ریکارڈ کیا گیا۔

مجموعی طور پر مالی سال 2027 کے پہلے چار ماہ (جولائی تا اکتوبر) کے دوران ترسیلاتِ زر 14 فیصد اضافے کے ساتھ 14.8 ارب ڈالر تک پہنچ گئیں، جبکہ گزشتہ مالی سال کے اسی عرصے میں یہ حجم 13 ارب ڈالر تھا۔

گزشتہ ماہ اسٹیٹ بینک نے پہلی سہ ماہی کے دوران ترسیلاتِ زر کی مستحکم آمد کو مدنظر رکھتے ہوئے مالی سال 2027 کے لیے ترسیلاتِ زر کا تخمینہ 44 ارب ڈالر سے بڑھا کر 45 ارب ڈالر کر دیا تھا۔

اکچکماک نے کہا کہ اس بہتری نے 2023 کی صورتحال کے ساتھ بالکل مختلف منظرنامہ پیش کیا ہے۔

انہوں نے کہا کہ 2023 میں بیرونی خسارے میں غیر معمولی اضافے اور زرمبادلہ کے ذخائر سے صرف ڈیڑھ ماہ کی درآمدات کی ادائیگی کی گنجائش باقی رہ جانے کے باعث پاکستان اپنے غیر ملکی کرنسی کے بانڈز پر ڈیفالٹ کے قریب پہنچ گیا تھا۔

انہوں نے مزید کہا کہ اس وقت کے بعد سے مجموعی زرمبادلہ کے ذخائر تقریباً پانچ گنا بڑھ چکے ہیں، مہنگائی کی شرح 38 فیصد سے کم ہو کر سنگل ڈیجٹ میں آ گئی (کم ترین سطح 0.2 فیصد اور تازہ ترین شرح 9.6 فیصد رہی)، جبکہ حصص بازار میں ڈالر کے لحاظ سے 318 فیصد اضافہ ریکارڈ کیا گیا، جو سالانہ بنیاد پر 53 فیصد بنتا ہے۔ اس عرصے کے دوران یہ غیر معمولی منافع ہے۔

اکچکماک نے اس معاشی بہتری کا سہرا بیرون ملک مقیم تقریباً ایک کروڑ پاکستانیوں کو بھی دیا۔

ان کا کہنا تھا کہ مستحکم حکومت اور مؤثر ثابت ہونے والے آئی ایم ایف پروگرام کے علاوہ ایک اہم عنصر جس نے معیشت کو بہت سہارا دیا، وہ بیرون ملک مقیم پاکستانی کارکنوں کی جانب سے بھیجی جانے والی ترسیلاتِ زر ہیں، جنہیں میں پاکستان کا تیل‘ قرار دیتا ہوں۔