پنجاب میں بلدیاتی انتخابات کا پہلا مرحلہ 7 فروری 2027 کو ہوگا، الیکشن کمیشن

الیکشن کمیشن آف پاکستان (ای سی پی) نے پنجاب میں بلدیاتی انتخابات کے پہلے مرحلے کے انعقاد کے لیے 7 فروری 2027 کی تاریخ مقرر کردی ہے۔

الیکشن کمیشن آف پاکستان کی جانب سے جمعرات کو جاری کردہ پریس ریلیز کے مطابق یہ فیصلہ پنجاب میں بلدیاتی انتخابات کے انعقاد سے متعلق درخواست کی سماعت کے دوران کیا گیا۔ سماعت کی صدارت چیف الیکشن کمشنر سکندر سلطان راجہ نے کی جبکہ چار رکنی بینچ بھی اس موقع پر موجود تھا۔

سماعت کے دوران چیف سیکریٹری پنجاب نے الیکشن کمیشن کو بتایا کہ صوبائی حکومت نے ابتدائی طور پر 15 دسمبر 2026 سے 15 جنوری 2027 کے درمیان بلدیاتی انتخابات کرانے پر اتفاق کیا تھا۔

تاہم مشاورت کے بعد پنجاب کابینہ کی کمیٹی نے اسموگ، شدید دھند، خراب موسمی حالات، رمضان المبارک اور اس عرصے کے دوران اسکول اساتذہ کی عدم دستیابی کو جواز بناتے ہوئے انتخابات اپریل 2027 تک ملتوی کرنے کی سفارش کی تھی۔

صوبائی حکومت نے اب درخواست کی ہے کہ انتخابات جنوری یا فروری 2027 میں کرائے جائیں کیونکہ فروری میں موسمی حالات بہتر ہو جاتے ہیں۔

حکومت کی درخواست کو مدنظر رکھتے ہوئے الیکشن کمیشن نے پنجاب میں بلدیاتی انتخابات کے پہلے مرحلے کے انعقاد کے لیے آئندہ سال 7 فروری کی تاریخ مقرر کردی۔

یہ پیشرفت الیکشن کمیشن کی جانب سے اسلام آباد میں بلدیاتی انتخابات کے لیے درکار تمام انتخابی مواد حاصل کرنے کے اعلان کے چند روز بعد سامنے آئی ہے۔ الیکشن کمیشن موجودہ قوانین کے تحت یہ انتخابات کرانے کے منصوبے پر پیش رفت کر رہا ہے۔

پیر کو جاری کردہ الیکشن کمیشن کے بیان کے مطابق ادارہ اسلام آباد کیپیٹل ٹیریٹری (آئی سی ٹی) میں بلدیاتی انتخابات کرانے کے لیے تیار ہے اور ان انتخابات کے لیے بیلٹ پیپرز کی چھپائی کے انتظامات بھی مکمل کر لیے گئے ہیں۔