کیمیکلز اینڈ ڈائز مرچنٹس کا شرح سود سنگل دیجٹ میں لانے کا مطالبہ

پاکستان کیمیکلز اینڈ ڈائز مرچنٹس ایسوسی ایشن (پی سی ڈی ایم اے) کے چیئرمین سلیم مکاتی نے گورنر اسٹیٹ بینک آف جمیل احمد پر زور دیا ہے کہ وہ 26 اکتوبر کو متوقع مانیٹری پالیسی کمیٹی (ایم پی سی) کے اجلاس میں پالیسی ریٹ میں کمی پر غور کریں، تاکہ معاشی سرگرمیوں کو تیز کیا جاسکے اور کاروباری برادری کو درپیش سرمائے کی قلت میں کمی لائی جاسکے۔

سلیم مکاتی نے کہا کہ موجودہ بلند پالیسی ریٹ کاروباری حلقوں کے لیے ایک سنگین رکاوٹ بن چکا ہے۔ ان کے مطابق پالیسی ریٹ کو سنگل ڈیجٹ میں لانے سے ملکی معیشت پر مثبت اثرات مرتب ہوں گے اور صنعت و تجارت کو نئی رفتار ملے گی۔

انہوں نے کہا کہ دنیا اس وقت معاشی غیر یقینی صورتحال سے دوچار ہے جبکہ پاکستان میں کاروباری اداروں اور صنعتوں کو بھی سنگین معاشی مشکلات کا سامنا ہے۔ ایسے حالات میں محض مہنگائی پر قابو پانے کے نام پر شرح سود میں اضافہ کسی طور مؤثر ثابت نہیں ہوگا، بلکہ یہ اقدام ناکام پالیسی ثابت ہوگا، جس کا بوجھ ہمیشہ تاجروں اور صنعت کاروں کو برداشت کرنا پڑتا ہے۔

پی سی ڈی ایم اے کے چیئرمین نے ایس بی پی کے گورنر پر زور دیا کہ وہ کاروباری برادری کے تحفظات کو سنجیدگی سے لیتے ہوئے معاشی استحکام کے لیے شرح سود میں کمی کی پالیسی اختیار کریں۔ انہوں نے کہا کہ اس اقدام سے نہ صرف صنعت و تجارت کو فروغ ملے گا بلکہ معاشی سرگرمیوں میں تیزی کے ذریعے روزگار کے نئے مواقع بھی پیدا ہوں گے اور کاروباری اداروں کو درپیش مالی مشکلات میں کمی آئے گی۔