اسپین کی فیفا عالمی درجہ بندی میں امریکا پر برتری مزید مستحکم

اسپین نے جاری ہونے والی فیفا/کوکا کولا ویمنز عالمی درجہ بندی میں امریکا پر اپنی برتری مزید مستحکم کرلی۔ حالیہ بین الاقوامی مقابلوں کے اختتام پر اسپین بدستور پہلے نمبر پر ہے، جہاں وہ اگست 2025 سے سرفہرست چلا آرہا ہے۔

اسپین نے حالیہ ونڈو کے دوران امریکی سرزمین پر امریکا کے خلاف دو میچ کھیلے۔ 10 اکتوبر کو واشنگٹن ڈی سی میں اسپین نے 2-0 سے کامیابی حاصل کی، جبکہ 13 اکتوبر کو چیسٹر، پنسلوانیا میں دوسرا مقابلہ 2-2 سے برابر رہا۔

درجہ بندی میں ابتدائی نو ٹیموں کی پوزیشن برقرار رہی۔ جرمنی، انگلینڈ اور جاپان بالترتیب تیسرے، چوتھے اور پانچویں نمبر پر ہیں، جبکہ فرانس، برازیل، سویڈن اور کینیڈا بھی اپنی سابقہ پوزیشنوں پر قائم ہیں۔

ڈنمارک دو درجے ترقی کرکے دسویں نمبر پر آگیا، جو اگست 2010 کے بعد پہلی بار ٹاپ ٹین میں شامل ہوا ہے۔ نیدرلینڈز اور شمالی کوریا ایک ایک درجہ تنزلی کے بعد بالترتیب 11 ویں اور 12ویں نمبر پر آگئے۔

ملاوی نے سب سے نمایاں ترقی کی اور 49 درجے بہتری کے بعد 104 ویں پوزیشن حاصل کی۔ ٹیم نے رواں موسم گرما میں ویمنز افریقہ کپ آف نیشنز کا فائنل کھیل کر اگلے سال برازیل میں ہونے والے ویمنز ورلڈ کپ کے لیے پہلی بار کوالیفائی کیا۔

مصر کو سب سے زیادہ نقصان اٹھانا پڑا، جو گزشتہ تین میچوں میں مجموعی طور پر 15-3 کے فرق سے شکست کھانے کے بعد 14 درجے تنزلی کے ساتھ 113ویں نمبر پر آگیا۔ فیفا/کوکا کولا ویمنز عالمی درجہ بندی کی اگلی اپ ڈیٹ 7 دسمبر کو جاری ہوگی۔