سلمان آغا کی شاندار سنچری، پاکستان نے سہ ملکی سیریز کے افتتاحی میچ میں سری لنکا کو 37 رنز سے شکست دے دی

تین ملکی ون ڈے سیریز میں پاکستان نے فاتحانہ آغاز کرتے ہوئے پہلے میچ میں سری لنکا کو 37 رنز سے شکست دے دی۔

راولپنڈی کرکٹ اسٹیڈیم میں سری لنکا نے ٹاس جیت کر فیلڈنگ کا فیصلہ کیا، 32 سالہ سلمان آغا نے 90 گیندوں پر ایک چھکے اور 10 چوکوں کی مدد سے 107 رنز کی اننگز کھیلی اور پاکستان کو 49.5 اوورز میں 305 رنز تک پہنچانے میں اہم کردار ادا کیا

فخر زمان 16 اور صائم ایوب 7 رنز بنا کر آؤٹ ہوئے، بابر اعظم نے 45 اور سعد بیگ نے 39 رنز سکور کیے، سلمان علی آغا نے سنچری اسکور کی اور 107 رنز بنا کر آؤٹ ہوئے، حسن نواز نے 37 اور عرفات منہاس نے 18 رنز جوڑے۔

سری لنکا کی جانب سے ایشن ملنگا نے 4 وکٹیں حاصل کیں، اسیتھا فرنینڈو نے 3 اور مدوشنکا نے 2 وکٹیں اپنے نام کیں۔

جواب میں سری لنکا کی ٹیم 48.1 اوورز میں 268 رنز بنا کر آؤٹ ہوگئی۔ اوپنر کامنڈو مینڈس نے 44 رنز سکور کیے، پاون رتھنا یاکے اور جانتھ لیاناگے نے نصف سنچریاں بنائیں تاہم وہ ٹیم کے کام نہ آئیں، پاون رتھنا یاکے نے 79 رنز کی اننگز کھیلی اور جانتھ لیاناگے نے 60 رنز بنائے۔

پاکستان کی جانب سے کپتان شاہین شاہ آفریدی نے 3 وکٹیں حاصل کیں، نسیم شاہ، حارث رؤف اور فہیم اشرف کے حصے میں 2،2 وکٹیں آئیں۔

سیریز کا دوسرا میچ منگل کو پاکستان اور انگلینڈ کے درمیان کھیلا جائے گا۔