امریکی ریاست اوریگن کے اسکول میں فائرنگ، 3 بچوں سمیت 4 افراد ہلاک

امریکی ریاست اوریگن کے شہر بینڈ میں جمعرات کو ایک ایلیمنٹری اسکول میں 16 سالہ مسلح حملہ آور کی فائرنگ سے 3 بچوں اور ایک استاد سمیت 4 افراد ہلاک ہوگئے، جبکہ حملہ آور بھی کمیونٹی کے ایک مسلح رکن کی فائرنگ سے مارا گیا۔

پولیس کے مطابق حملہ آور نے سلور ریل ایلیمنٹری اسکول کے مقفل دروازوں پر فائرنگ کرکے اندر داخل ہونے کا راستہ بنایا۔ کمیونٹی کے ایک مسلح رکن نے اسے اسکول میں داخل ہوتے دیکھا اور اس کا تعاقب کیا۔

بینڈ پولیس چیف مائیک کرانٹز نے پریس کانفرنس میں بتایا کہ ہلاک ہونے والے بچوں کی عمریں 5، 8 اور 11 سال تھیں۔ فائرنگ سے ایک 7 سالہ طالب علم اور 54 سالہ استاد شدید زخمی ہوئے، جنہیں اسپتال منتقل کردیا گیا۔

اوریگن کی گورنر ٹینا کوٹیک نے حملہ روکنے اور مزید جانی نقصان سے بچانے کے لیے مداخلت کرنے والے شہری کا شکریہ ادا کیا۔

پولیس چیف کے مطابق پولیس اہلکاروں نے اگست میں اسکولوں میں فائرنگ جیسے واقعات سے نمٹنے کی خصوصی تربیت حاصل کی تھی۔ حکام نے واقعے کی تحقیقات جاری رکھنے کا اعلان کیا ہے۔

بینڈ شہر تقریباً ایک لاکھ آبادی پر مشتمل ہے اور ریاست اوریگن کے وسطی علاقے میں واقع ہے۔ سلور ریل ایلیمنٹری اسکول میں تقریباً 450 طلبہ زیر تعلیم ہیں، جبکہ عملے کے ارکان کی تعداد 40 ہے۔

واقعے کے بعد امریکا میں اسلحے کے قوانین اور اسکولوں میں سکیورٹی سے متعلق بحث دوبارہ شروع ہوگئی ہے۔ اسلحے پر کنٹرول کی حامی سابق امریکی رکن کانگریس گیبریل گفورڈز نے واقعے پر افسوس کا اظہار کرتے ہوئے رہنماؤں سے عملی اقدامات کا مطالبہ کیا۔