فرانس کے مالیاتی بحران کے باعث یورو کمزور، ڈالر 17 ماہ کی بلند سطح کے قریب

امریکی ڈالر نے ہفتے کا آغاز مضبوط انداز میں کیا اور پیر کو 17 ماہ کی بلند ترین سطح کے قریب رہا، کیونکہ سرمایہ کاروں نے کمزور امریکی روزگار کے اعداد و شمار کے بعد رواں ماہ فیڈرل ریزرو کی جانب سے شرح سود میں اضافے کے امکانات کا جائزہ لیا، جبکہ فرانس کے مالیاتی خدشات نے یورو کو دباؤ میں رکھا۔

یورو 1.1246 ڈالر پر مئی 2025 کے بعد کی کم ترین سطح کے قریب برقرار رہا۔ فرانس کے بڑھتے ہوئے قرضوں اور آئندہ سال ہونے والے انتخابات سے قبل سیاسی تعطل کے خدشات کے باعث یورو مسلسل چوتھے ہفتے بھی گراوٹ کا شکار رہا۔

برطانوی پاؤنڈ 1.3241 ڈالر جبکہ جاپانی ین 157.69 فی ڈالر پر رہا۔ چھ بڑی کرنسیوں کے مقابلے میں ڈالر کی قدر جانچنے والا ڈالر انڈیکس 101.97 پر آگیا۔

دوسری جانب گزشتہ ہفتے بانڈ مارکیٹ میں شدید فروخت کے باعث عالمی قرض لینے کی لاگت کئی دہائیوں کی بلند سطح تک پہنچ گئی، جبکہ تیل کی بڑھتی قیمتوں سے افراط زر کے خدشات نے فرانسیسی قرضوں کو بھی متاثر کیا۔ امریکی 10 سالہ ٹریژری بانڈ کی پیداوار 5.262 فیصد رہی۔

ایبری کے سربراہ مارکیٹ حکمت عملی میتھیو ریان نے کہا کہ موجودہ صورتحال میں ڈالر کو فائدہ ہو رہا ہے، کیونکہ ٹریژری بانڈز کی بلند ییلڈ امریکی اثاثوں کی کشش بڑھا رہی ہے اور عالمی قرض مارکیٹ میں فروخت سے محفوظ سرمایہ کاری کے طور پر ڈالر کی طلب میں اضافہ ہوا ہے۔

سی ایم ای فیڈ واچ ٹول کے مطابق اکتوبر میں امریکی شرح سود برقرار رہنے کا امکان 78 فیصد ہوگیا ہے، جو ایک ہفتہ قبل 36 فیصد تھا۔ سرمایہ کار اب بھی دسمبر میں شرح سود بڑھنے اور 2027 کی پہلی ششماہی میں مزید دو اضافوں کی توقع کر رہے ہیں۔

تاہم تجزیہ کاروں کا کہنا ہے کہ مارکیٹ کی موجودہ توقعات ضرورت سے زیادہ جارحانہ ہوسکتی ہیں اور فیڈ اتنی مرتبہ شرح سود میں اضافہ نہیں کرے گا۔ جیفریز کے مطابق رواں صورتحال میں فیڈ اور یورپی مرکزی بینک کی جانب سے ایک ایک شرح سود اضافے کا امکان زیادہ ہے۔