لکی موٹر نے نئی کیا اسٹونک ٹربو کی بکنگ کا آغاز کردیا

لکی موٹر کارپوریشن (ایل ایم سی) نے جمعرات کو نئی کیا اسٹونک 1.0 لیٹر ٹربو کی باضابطہ لانچنگ کا اعلان کرتے ہوئے یکم اکتوبر سے اس کمپیکٹ کراس اوور کی بکنگ بھی شروع کردی ہے۔

اسٹونک دو مختلف ماڈلز میں دستیاب ہوگی۔ 1.0 لیٹر ٹربو ایکس کی قیمت 54 لاکھ 99 ہزار روپے جبکہ 1.0 لیٹر ٹربو ایس کی قیمت 58 لاکھ 99 ہزار روپے مقرر کی گئی ہے، یعنی دونوں ماڈلز کی قیمت میں 4 لاکھ روپے کا فرق ہے۔ دونوں قیمتیں ایکس فیکٹری ہیں اور ان میں فریٹ اور انشورنس کے اخراجات شامل نہیں ہیں۔

ایل ایم سی کے مطابق اس ماڈل میں کیا کی جدید ترین ڈیزائن خصوصیات، 17 انچ الائے وہیلز اور نیا دو رنگی اندرونی ڈیزائن دیا گیا ہے۔ گاڑی میں 1.0 لیٹر ٹربو چارجڈ انجن نصب ہے، جسے 7 اسپیڈ ڈوئل کلچ ٹرانسمیشن (ڈی سی ٹی) کے ساتھ منسلک کیا گیا ہے۔ کمپنی کے مطابق اس کا مقصد ایندھن کی بچت اور ڈرائیونگ کو زیادہ آسان بنانا ہے۔ کمپنی نے اس ماڈل کی قیمت کو اس سیگمنٹ کے لیے پرکشش قرار دیا ہے۔

صارفین اپنی قریبی کیا ڈیلرشپ یا ایل ایم سی کے آن لائن بکنگ پورٹل کے ذریعے گاڑی بک کراسکتے ہیں۔

بکنگ کی شرائط کے مطابق مکمل ادائیگی کرنے والے صارفین کو محدود اسٹاک کے لیے پہلے آئیے، پہلے پائیے کی بنیاد پر قیمت محفوظ رکھنے کی سہولت حاصل ہوگی، جبکہ گاڑیوں کی ڈیلیوری نومبر اور دسمبر 2026 میں شیڈول کی گئی ہے۔

دسمبر 2026 کے بعد گاڑی کی ڈیلیوری کے خواہش مند خریدار 10 لاکھ روپے کی جزوی ادائیگی کے ساتھ بکنگ کراسکتے ہیں۔ تمام ادائیگیاں لکی موٹر کارپوریشن کے نام پر کی جائیں گی۔

کمپنی نے مزید کہا کہ ڈیلیوری سے قبل حکومت کی جانب سے عائد کیا جانے والا کوئی بھی نیا یا اضافی ڈیوٹی، ٹیکس یا چارج، جس کے نتیجے میں گاڑی کی قیمت میں تبدیلی ہو، اس کی ادائیگی صارف کو کرنا ہوگی۔