جنوبی کوریا کے صدر لی کی شمالی کوریا سے مذاکرات بحال کرنے کی اپیل

جنوبی کوریا کے صدر لی جے میونگ نے جمعرات کو شمالی کوریا پر زور دیا ہے کہ وہ اعتماد کی بحالی اور مذاکرات دوبارہ شروع کرنے میں تعاون کرے۔ ان کا یہ بیان ایک روز بعد سامنے آیا جب بارودی سرنگ کے واقعے پر دونوں ممالک کے درمیان سخت بیانات کا تبادلہ ہوا ہے، جبکہ جنوبی کوریا کی فوج اور اقوام متحدہ کی کمان نے اسے جنگ بندی معاہدے کی خلاف ورزی قرار دیا تھا۔

جنوبی کوریا کے یومِ مسلح افواج کے موقع پر خطاب کرتے ہوئے لی میونگ نے کہا کہ وہ امید کرتے ہیں کہ شمالی کوریا طویل تعطل کے بعد اعتماد کی بحالی اور مذاکرات کی بحالی کے راستے پر ساتھ دے گا۔ انہوں نے کہا کہ ان کی حکومت دونوں کوریاؤں کے درمیان فوجی کشیدگی کم کرنے کیلئے عملی اقدامات جاری رکھے گی۔

گزشتہ ہفتے غیر فوجی علاقے میں بارودی سرنگ کے دھماکے میں جنوبی کوریا کے 3 فوجی زخمی ہوئے تھے۔ شمالی کوریا کے رہنما کم جونگ اُن کی بہن کم یو جونگ نے ان الزامات کو مسترد کرتے ہوئے سیول پر نتائج گھڑنے کا الزام عائد کیا تھا۔

لی میونگ نے مزید کہا کہ جنوبی کوریا 2030 کی دہائی کے وسط تک جوہری توانائی سے چلنے والی آبدوزیں بنانے اور میزائل دفاعی صلاحیتیں جدید بنانے کا ارادہ رکھتا ہے۔