پاکستانی سی فوڈ صنعت کی روسی مارکیٹ میں انٹری

پاکستان کی سی فوڈ انڈسٹری بین الاقوامی منڈیوں میں اپنی رسائی بڑھا رہی ہے جب کہ پاکستانی سمندری خوراک کی مصنوعات کو روسی مارکیٹ میں بڑھتی ہوئی دلچسپی اور پذیرائی حاصل ہورہی ہے۔

سی گرین انٹرپرائزز (پرائیویٹ) لمیٹڈ کے چیف ایگزیکٹو آفیسر (سی ای او) عاصم ابرار روس میں پاکستان کے تجارتی مشن کے تعاون سے سینٹ پیٹرزبرگ میں منعقدہ سی فوڈ نمائش میں پاکستان کی قیادت کر رہے ہیں۔

عاصم ابرار کے مطابق روسی خریداروں اور نمائش میں آنے والے افراد کی جانب سے ردعمل انتہائی حوصلہ افزا رہا ہے جو روس میں پاکستانی سی فوڈ کی برآمدات کے وسیع امکانات کو ظاہر کرتا ہے۔

انہوں نے کہا کہ پاکستان کے تجارتی مشن، وزارتِ بحری امور اور میرین فشریز ڈیپارٹمنٹ کی کوششوں نے مارکیٹ تک رسائی میں سہولت فراہم کرنے میں اہم کردار ادا کیا ہے۔

انہوں نے کہا کہ روسی مارکیٹ میں سی گرین انٹرپرائزز میں بڑھتی ہوئی دلچسپی ایک اہم کامیابی ہے، یہ پاکستان کے لیے بھی ایک حوصلہ افزا پیش رفت ہے کیونکہ اس سے ظاہر ہوتا ہے کہ ملک کی سی فوڈ مصنوعات میں بین الاقوامی منڈیوں میں کامیابی سے مسابقت کرنے کی بھرپور صلاحیت موجود ہے۔