ڈالر کے مقابلے میں روپیہ مزید مضبوط

انٹربینک مارکیٹ میں جمعرات کو بھی ڈالر کے مقابلے روپیہ مزید مضبوط ہوگیا۔

اسٹیٹ بینک کے مطابق کاروبار کے اختتام پر ڈالر کے مقابلے میں روپیہ ایک پیسے کی بہتری سے 277.35 روپے پر بند ہوا۔

یاد رہے کہ بدھ کو مقامی کرنسی 277.36 روپے پر بند ہوئی تھی۔

دریں اثنا بین الاقوامی سطح پر جمعرات کو محتاط کاروبار کے دوران کرنسی مارکیٹس میں محدود اتار چڑھاؤ دیکھا گیا، کیونکہ سرمایہ کار تیل کی قیمتوں اور عالمی بانڈ ییلڈز میں تازہ اضافے کا جائزہ لیتے رہے، جبکہ امریکی پی پی آئی اور افراطِ زر کے اعدادوشمار سے قبل ین کی تیز رفتار بحالی بھی رک گئی۔

توانائی کی قیمتوں کے باعث افراطِ زر کے نئے دباؤ نے عالمی بانڈ ییلڈز میں دوبارہ اضافہ کردیا، جبکہ 10 سالہ امریکی ٹریژری بانڈز کی بینچ مارک ییلڈ 2023 کے بعد بلند ترین سطح پر پہنچ گئی۔ طویل مدتی بانڈز کی بائی بیک اسکیم بھی توقعات پر پورا نہ اتر سکی۔

ڈالر کو معمولی سہارا ملا، جس کے نتیجے میں یورو اور پاؤنڈ قدرے کمزور ہوکر بالترتیب 1.1633 ڈالر اور 1.3547 ڈالر کی سطح پر آگئے۔

اس پیش رفت سے جاپانی ین کی سات ماہ کی بلند ترین سطح کی جانب پیش قدمی بھی رک گئی۔ ین آخری بار 153.70 فی ڈالر پر قدرے کمزور ہوکر ٹریڈ ہوا، جبکہ بینک آف جاپان کی جانب سے آئندہ ہفتے شرح سود میں اضافے کی توقع کے باعث یہ محدود دائرے میں رہا۔

ڈالر انڈیکس، جو مختلف کرنسیوں کے مقابلے میں ڈالر کی قدر ظاہر کرتا ہے، 98.81 پر رہا اور تین ہفتوں کی کم ترین سطح سے معمولی اوپر آیا۔

اب ہفتے کے اختتام تک سرمایہ کاروں کی توجہ اہم معاشی اعدادوشمار پر مرکوز ہے۔ مارکیٹ کی توجہ جمعرات کو امریکی پروڈیوسر پرائس انڈیکس اور جمعہ کو کنزیومر پرائس انڈیکس کے اعدادوشمار پر رہے گی۔ یہ 15 اور 16 ستمبر کو ہونے والے ایف او ایم سی اجلاس سے قبل اہم اعدادوشمار کی آخری کڑی ہوں گے۔

کرنسی کی قدر کے اہم اشاریے تیل کی قیمتیں جمعرات کو مستحکم رہیں، جب برینٹ خام تیل 100 ڈالر فی بیرل سے تجاوز کرگیا۔ ایران اور امریکا کی جانب سے چھ ماہ سے جاری تنازع کے آغاز کے بعد بحری جہازوں پر سب سے بڑے حملوں کے باعث تاجر سپلائی میں مزید رکاوٹوں کے خدشات کا جائزہ لے رہے ہیں۔

برینٹ خام تیل کے مستقبل کے سودے 0.1 فیصد کمی سے 101.10 ڈالر فی بیرل پر آگئے، جو 0256 جی ایم ٹی پر ریکارڈ کیے گئے۔

امریکی ویسٹ ٹیکساس انٹرمیڈیٹ خام تیل 0.2 فیصد اضافے سے 96.24 ڈالر فی بیرل پر رہا۔