او جی ڈی سی ایل کا تاریخ ساز منافع، سالانہ ڈیوڈنڈ بھی بلند ترین سطح پر

آئل اینڈ گیس ڈویلپمنٹ کمپنی لمیٹڈ (او جی ڈی سی ایل) کے بورڈ آف ڈائریکٹرز نے جمعہ کو منعقدہ اجلاس میں 30 جون 2026 کو ختم ہونے والے مالی سال کے مالی نتائج کا اعلان کردیا جس کے مطابق کمپنی نے بعد از ٹیکس سب سے زیادہ 242.37 ارب روپے منافع حاصل کیا جو گزشتہ سال کے مقابلے میں 43 فیصد زیادہ ہے۔

او جی ڈی سی ایل نے 449.191 ارب روپے کی خالص فروخت ریکارڈ کی اور بعد از ٹیکس 242.374 ارب روپے کا اب تک کا سب سے زیادہ منافع حاصل کیا جو گزشتہ سال کے مقابلے میں 43 فیصد زیادہ ہے۔ کمپنی کی فی حصص آمدن بھی گزشتہ سال کے 39.50 روپے سے بڑھ کر 56.35 روپے ہوگئی۔

بورڈ نے 6 روپے فی حصص (60 فیصد) حتمی نقد منافع دینے کا اعلان کیا جو کمپنی کی تاریخ میں کسی سہ ماہی میں دیا جانے والا اب تک کا سب سے زیادہ منافع ہے۔ یہ پہلے ہی ادا کیے گئے 11 روپے فی حصص عبوری منافع کے علاوہ ہے جس کے بعد سالانہ مجموعی منافع 17 روپے فی حصص (170 فیصد) ہوگیا ہے جو کمپنی کی جانب سے اعلان کردہ اب تک کا سب سے زیادہ سالانہ منافع ہے۔

سال کے دوران او جی ڈی سی ایل نے کارپوریٹ ٹیکس، منافع، رائلٹیز اور دیگر حکومتی محصولات کی مد میں 187 ارب روپے خزانے میں جمع کرائے۔ کمپنی کی جانب سے تیل و گیس کی پیداوار کے نتیجے میں درآمدی متبادل کے ذریعے 3.31 ارب ڈالر کی زرمبادلہ کی بچت ہوئی۔ وصولیوں میں بہتری کے باعث مجموعی وصولی کی شرح 107 فیصد رہی جبکہ سال کے دوران 577 ارب روپے وصول کیے گئے۔

مالی سال کے دوران کمپنی کے حصص کی قیمت میں 52 فیصد اضافہ ہوا جو کے ایس ای-100 انڈیکس میں ہونے والے 44 فیصد اضافے سے زیادہ ہے۔ 30 جون 2026 تک او جی ڈی سی ایل کی مارکیٹ کیپٹلائزیشن تقریباً 1.44 کھرب روپے تک پہنچ گئی جس سے پاکستان کی سب سے بڑی لسٹڈ کمپنی کی حیثیت مزید مستحکم ہوگئی۔

او جی ڈی سی ایل نے سال کے دوران تلاش اور ڈرلنگ کے شعبے میں بھی اہم کامیابیاں حاصل کیں۔ کمپنی نے تیل و گیس کے 9 نئے ذخائر دریافت کیے جن کے نتیجے میں 12 کروڑ بیرل مساوی تیل (ایم ایم بی او ای) کے 2P ذخائر میں اضافہ ہوا اور ذخائر کی متبادل شرح 236 فیصد رہی جو کمپنی کی تاریخ میں بلند ترین سطح ہے۔ کمپنی نے 23 کنوؤں کی کھدائی شروع کی اور مجموعی طور پر 58,333 میٹر ڈرلنگ کی جو گزشتہ پانچ برسوں میں ریکارڈ کی جانے والی بلند ترین سطح ہے۔ اس کے علاوہ او جی ڈی سی ایل نے مزید 15 ایکسپلوریشن بلاکس میں حصص حاصل کیے۔

سال کے دوران او جی ڈی سی ایل کی اوسط یومیہ خالص قابلِ فروخت پیداوار 32,861 بیرل خام تیل، 667 ملین مکعب فٹ گیس اور 670 ٹن ایل پی جی رہی جو مسلسل پیداوار میں کمی کے باوجود گزشتہ سال کے مقابلے میں بالترتیب 6.3 فیصد، 2.3 فیصد اور 4.4 فیصد زیادہ ہے۔

علاقائی توانائی کی صورتحال کے تناظر میں او جی ڈی سی ایل نے ملک میں توانائی کی طلب و رسد کے فرق کو کم کرنے میں مدد کے لیے پیداوار میں کامیابی سے اضافہ کیا۔ اپریل 2026 میں کمپنی کی مجموعی خام تیل کی پیداوار پہلی مرتبہ 40,000 بیرل یومیہ سے تجاوز کرگئی، جو گزشتہ 27 سہ ماہیوں میں بلند ترین سطح ہے۔

کاپی رائٹ بزنس ریکارڈر 2026