اوپن اے آئی کا اسپیس ایکس کے کرسر کو اے آئی ماڈلز کی فراہمی بند کرنے کا اعلان،ایلون مسک سے تنازع شدت اختیار کرگیا

اوپن اے آئی نے جمعے کو کہا کہ وہ ایلون مسک کی ملکیت والی اسپیس ایکس کی زیرملکیت کوڈنگ ٹول کمپنی کرسر کو اپنے اے آئی ماڈلز کی فراہمی بند کرنے کا ارادہ رکھتی ہے، جس سے اوپن اے آئی کے سی ای او سیم آلٹمین اور مسک کے درمیان جاری تلخ کشمکش مزید شدت اختیار کرگئی ہے۔

مسک اور آلٹمین کے درمیان کئی برس سے اختلافات چلے آرہے ہیں، جو رواں سال کے اوائل میں اوپن اے آئی کے خلاف مسک کے 150 ارب ڈالر کے مقدمے کی سماعت کے دوران مزید نمایاں ہوگئے۔ مقدمے کے دوران مسک کے وکیل نے کہا تھا کہ مسک اور دیگر گواہوں نے آلٹمین کو جھوٹا قرار دیتے ہوئے گواہی دی، جبکہ اوپن اے آئی کا مؤقف تھا کہ مسک کمپنی کا کنٹرول حاصل کرنا چاہتے تھے۔

اوپن اے آئی نے ایک بلاگ پوسٹ میں کہا، ’’ہم یہ فیصلہ اس لیے کر رہے ہیں کیونکہ ہمیں اپنے تجربے کی بنیاد پر یقین نہیں کہ اسپیس ایکس ہماری ٹیکنالوجی کو سروس کی شرائط کے مطابق استعمال کرے گی، کیونکہ ایلون مسک کی کمپنیوں کی جانب سے معاہدوں کی خلاف ورزی کے واقعات سامنے آچکے ہیں۔‘‘

مسک نے ہفتے کی صبح ایکس پر ردعمل دیتے ہوئے لکھا، ’’مجھے اس کی ذرا بھی پروا نہیں۔‘‘

انہوں نے آلٹمین اور اوپن اے آئی کے صدر گریگ بروک مین کو ’’ناقابلِ اعتماد‘‘ قرار دیتے ہوئے الزام عائد کیا کہ انہوں نے ’’ایک اوپن سورس غیر منافع بخش ادارہ چوری کیا‘‘۔ مسک نے یہ دعویٰ بھی دہرایا۔

دنیا کے امیر ترین شخص مسک نے اوپن اے آئی اور آلٹمین کے خلاف مقدمہ دائر کرتے ہوئے الزام عائد کیا تھا کہ انہوں نے کمپنی کے اصل غیر منافع بخش مشن سے انحراف کرکے ’’ایک فلاحی ادارہ چوری‘‘ کیا اور اسے اپنے ذاتی مفاد کے لیے استعمال کیا۔ رواں سال کے اوائل میں وفاقی جیوری نے مسک کے خلاف فیصلہ دیتے ہوئے قرار دیا تھا کہ انہوں نے مقدمہ دائر کرنے میں بہت تاخیر کی۔

تاہم، کرسر کے شریک بانی اور اب اسپیس ایکس کے ایک عہدیدار مائیکل ٹروئل نے ایکس پر کہا کہ کمپنی اس معاملے کے حل کے لیے اوپن اے آئی کی ٹیم سے بات چیت کر رہی ہے۔

اوپن اے آئی کے اعلان کے چند گھنٹے بعد، دونوں کمپنیوں کی حریف اینتھروپک نے کہا کہ وہ کرسر میں اپنے کلاڈ ماڈلز کی معاونت کے لیے کمپیوٹنگ صلاحیت میں اضافہ کرنے کا ارادہ رکھتی ہے۔ اینتھروپک کے شریک بانیوں میں سے ایک ٹام براؤن نے یہ بات بتائی۔

اوپن اے آئی نے اپنی بلاگ پوسٹ میں کہا کہ ایکس، جو پہلے ٹوئٹر کے نام سے جانا جاتا تھا اور اب اسپیس ایکس کا حصہ ہے، نے ایلون مسک کی جانب سے پلیٹ فارم کے حصول کے بعد اوپن اے آئی کے ساتھ معاہدے کی شرائط کی خلاف ورزی کی۔

اے آئی کمپنی نے مزید کہا، ’’اسپیس ایکس جیسے بڑے شراکت دار کے ساتھ کام کرنے کے لیے ہم عموماً مخصوص معاہدوں پر انحصار کرتے ہیں تاکہ اپنی سروس شرائط کی پابندی یقینی بنائی جا سکے اور اس بات کو بھی یقینی بنایا جا سکے کہ انضمام بڑے پیمانے پر محفوظ انداز میں ہو۔‘‘

چیٹ جی پی ٹی بنانے والی کمپنی نے کہا کہ اس نے سروس بند کرنے کے لیے 12 نومبر 2026 کی تاریخ تجویز کی ہے، جبکہ کرسر کے ساتھ اس کے معاہدے میں اسے ’’ملکیت میں تبدیلی‘‘ کی صورت میں معاہدہ منسوخ کرنے کے لیے محدود مدت دی گئی ہے۔

اسپیس ایکس نے جون میں کرسر کی بانی اسٹارٹ اپ کمپنی اینی اسفیئر کو 60 ارب ڈالر کے تمام حصص پر مشتمل معاہدے کے تحت خریدنے کا اعلان کیا تھا اور رواں ماہ کے آغاز میں یہ حصول مکمل کر لیا تھا۔