ریاض ایئر کا پاکستان میں آپریشنز کا آغاز، پہلی پرواز اسلام آباد پہنچ گئی

پاکستان ایئرپورٹس اتھارٹی (پی اے اے ) کے بیان کے مطابق سعودی عرب کی نئی قومی فضائی کمپنی ریاض ایئر نے جمعہ کی شام ریاض سے اپنی پہلی پرواز RX-660 کی اسلام آباد انٹرنیشنل ایئرپورٹ آمد کے ساتھ پاکستان میں باضابطہ طور پر فضائی آپریشنز کا آغاز کردیا ہے۔

پی اے اے کے مطابق پرواز 69 مسافروں کے ساتھ اسلام آباد پہنچی جہاں ٹرمینل کی جانب روانگی کے دوران اسے روایتی واٹر سیلوٹ پیش کیا گیا۔ یہ پاکستان میں ریاض ایئر کی پہلی پرواز تھی۔

ریاض ایئر سے توقع ہے کہ وہ ریاض اور اسلام آباد کے درمیان ہفتے میں سات پروازیں چلائے گی جس سے پاکستان اور سعودی عرب کے درمیان ایک اضافی براہِ راست فضائی رابطہ قائم ہوگا۔

پاکستان ایئرپورٹس اتھارٹی (پی اے اے ) کی جانب سے اسلام آباد انٹرنیشنل ایئرپورٹ پر افتتاحی تقریب کا انعقاد کیا گیا۔ تقریب کے مہمانِ خصوصی سعودی عرب کے سفیر نواف بن سعید المالکی تھے جب کہ ڈائریکٹر جنرل پی اے اے ایئر وائس مارشل ذیشان سعید اعلیٰ سرکاری حکام اور ریاض ایئر کی سینئر انتظامیہ نے بھی شرکت کی۔

اس موقع پر سعودی سفیر نے کہا کہ ریاض ایئر کی پہلی پرواز پاکستان اور سعودی عرب کے درمیان دیرینہ تعلقات اور فضائی رابطوں کو مزید مضبوط بنانے کے حوالے سے انتہائی اہمیت کی حامل ہے۔

ذیشان سعید نے ریاض ایئر کے فضائی آپریشنز کے آغاز کا خیرمقدم کرتے ہوئے کہا کہ یہ نیا فضائی رابطہ روابط کو بہتر بنانے، مسافروں کی آمدورفت میں سہولت فراہم کرنے اور ہوا بازی کے شعبے میں مزید تعاون کے فروغ میں اہم کردار ادا کرے گا۔

تقریب میں پروازوں کے آغاز کی مناسبت سے فیتہ کاٹنے اور کیک کاٹنے کی تقریب بھی منعقد کی گئی۔ ریاض ایئر کی اعلیٰ انتظامیہ نے ائرلائن کی مستقبل میں توسیع کے منصوبوں اور پاکستان میں مزید ترقی کے امکانات پر بھی روشنی ڈالی۔

افتتاحی تقریب کے بعد ریاض ایئر کی پرواز RX-660 رات 9 بج کر 56 منٹ پر 272 مسافروں کے ساتھ اسلام آباد انٹرنیشنل ایئرپورٹ سے روانہ ہوگئی۔

ریاض ایئر کے فضائی آپریشنز کا آغاز پاکستان اور سعودی عرب کے درمیان فضائی رابطوں میں ایک اہم سنگِ میل ہے اور یہ دوطرفہ تعلقات اور ہوا بازی کے شعبے کے لیے ایک مثبت پیش رفت بھی قرار دیا جا رہا ہے۔