آبنائے ہرمز کھلنے کی امید، سونا سات ہفتوں کی بلند ترین سطح پر پہنچ گیا

عالمی منڈی میں سونے کی قیمتوں میں جمعرات کو مسلسل چوتھے روز اضافہ ریکارڈ کیا گیا، جبکہ اس کی قیمت سات ہفتوں کی بلند ترین سطح پر پہنچ گئی۔ تیل کی قیمتوں میں کمی، امریکی ڈالر کی کمزوری اور امریکی حکومتی بانڈز کی پیداوار (ٹریژری ییلڈ) میں کمی نے قیمتی دھات کو سہارا دیا۔ سرمایہ کار اس امید پر پُرامید ہیں کہ ایران اور عمان کے درمیان جاری مذاکرات کے نتیجے میں آبنائے ہرمز دوبارہ کھل سکتی ہے اور امریکا و ایران کے درمیان پانچ ماہ سے جاری جنگ کے خاتمے کی راہ ہموار ہو سکتی ہے۔

اسپاٹ گولڈ کی قیمت ایک فیصد اضافے کے ساتھ 4,285.84 ڈالر فی اونس تک پہنچ گئی، جو 18 جون کے بعد بلند ترین سطح ہے۔ امریکی گولڈ فیوچرز بھی 0.9 فیصد اضافے کے ساتھ 4,345.80 ڈالر فی اونس پر ٹریڈ کرتے رہے۔

آئی جی مارکیٹس کے تجزیہ کار ٹونی سائکامور کے مطابق مشرق وسطیٰ میں سفارتی پیش رفت کی توقعات نے سرمایہ کاروں کے اعتماد کو تقویت دی ہے۔ ان کا کہنا تھا کہ اگر تیل کی قیمتیں دباؤ میں رہتی ہیں تو مرکزی بینکوں کو شرح سود بڑھانے کی ضرورت کم ہوگی، جو سونے کے لیے مثبت اشارہ ہے۔ انہوں نے مزید کہا کہ اگر سونا اپنی 200 روزہ اوسط سے اوپر برقرار رہتا ہے تو قیمت 5,000 ڈالر فی اونس کی جانب بڑھ سکتی ہے۔

رائٹرز کے مطابق ایران اور عمان کے درمیان زیر غور معاہدے کے تحت تہران کو آبنائے ہرمز کے ذریعے خلیج میں داخل ہونے والے جہازوں کی نگرانی کا اختیار دیا جا سکتا ہے۔

ادھر سرمایہ کار جمعہ کو جاری ہونے والی امریکی جولائی کی نان فارم پے رولز رپورٹ کا بھی انتظار کر رہے ہیں۔ اے ڈی پی کی رپورٹ کے مطابق جولائی میں نجی شعبے میں ملازمتوں کی رفتار سست رہی، جس سے شرح سود میں اضافے کی توقعات کمزور پڑی ہیں۔

دیگر قیمتی دھاتوں میں اسپاٹ چاندی 0.1 فیصد اضافے سے 62.16 ڈالر، پلاٹینم 1.7 فیصد بڑھ کر 1,764.10 ڈالر جبکہ پیلیڈیم 1.1 فیصد اضافے کے ساتھ 1,377.83 ڈالر فی اونس پر پہنچ گیا۔