اسٹاک ایکسچینج میں فروخت کا دباؤ، 100 انڈیکس 2000 پوائنٹس گرگیا

امریکا اور ایران کے درمیان جنگ میں حالیہ دنوں کے نسبتاً پُرسکون ماحول کو مشرقِ وسطیٰ میں ہونے والے نئے حملوں نے تہس نہس کردیا جس کے بعد پاکستان اسٹاک ایکسچینج (پی ایس ایکس) میں فروخت کا دباؤ دیکھنے میں آیا۔ بدھ کو ٹریڈنگ کے دوران بینچ مارک کے ایس ای انڈیکس تقریباً 2,000 پوائنٹس تک گرگیا۔

صبح 11:40 بجے بینچ مارک کے ایس ای 100 انڈیکس 1,986.33 پوائنٹس یا 1.12 فیصد کی کمی سے 175,637.55 پوائنٹس پر آگیا۔

فروخت کا دباؤ اہم شعبوں میں دیکھا گیا جن میں آٹوموبائل اسمبلرز، سیمنٹ، کیمیکل، کمرشل بینکس، تیل و گیس کی تلاش کرنے والی کمپنیاں، آئل مارکیٹنگ کمپنیاں (او ایم سیز) اور بجلی پیدا کرنے والی کمپنیاں شامل ہیں۔ وافی، حبکو، ماری، اوجی ڈی سی، ایم سی بی ، ایم ای بی ایل ، پی ایس او، پی او ایل اور یوبی ایل بھی منفی زون میں دکھائی دیے۔

یاد رہے کہ منگل کو اسٹاک ایکسچینج مندی کے ساتھ بند ہوئی کیونکہ پیر کے روز ہونے والی زبردست تیزی کے بعد سرمایہ کاروں نے پرافٹ ٹیکنگ کو ترجیح دی۔ گزشتہ روز بینچ مارک 100 انڈیکس 638.45 پوائنٹس یعنی 0.36 فیصد کی کمی سے 177,623 پوائنٹس پر بند ہوا۔

عالمی سطح پر بدھ کو ایشیائی اسٹاک مارکیٹوں میں ایک دن پہلے کی شدید فروخت کے بعد دوبارہ بہتری دیکھی گئی۔ اس سے قبل حصص کی بلند قیمتوں، بڑھتے ہوئے مسابقتی دباؤ اور مصنوعی ذہانت پر بڑھتے ہوئے اخراجات سے متعلق خدشات نے مارکیٹوں کو ہلا کر رکھ دیا تھا۔ سرمایہ کار بڑی ٹیکنالوجی کمپنیوں کے اہم مالی نتائج اور امریکی فیڈرل ریزرو کے پالیسی فیصلے سے قبل محتاط رویہ اختیار کیے ہوئے تھے۔

ایشیائی چِپ ساز کمپنیاں اس سال مصنوعی ذہانت سے چلنے والی اسٹاک مارکیٹ کی تیزی کا مرکز رہی ہیں، تاہم حالیہ عرصے میں سرمایہ کاروں کو اس تیزی کے برقرار رہنے پر خدشات لاحق ہوئے جس کے باعث مارکیٹ میں شدید اتار چڑھاؤ دیکھنے میں آیا۔ تاہم ایس کے ہائینکس کے مضبوط مالی نتائج نے ان خدشات کو کسی حد تک کم کر دیا۔

منگل کو تین ماہ کی کم ترین سطح پر پہنچنے اور 10 فیصد سے زائد گرنے کے بعد، بدھ کو ابتدائی ٹریڈنگ میں جنوبی کوریا کے کاپسی انڈیکس میں 1 فیصد سے زیادہ اضافہ دیکھا گیا۔چِپ ساز کمپنی ایس کے ہائینکس کے شیئرز میں 2 فیصد اضافہ ہوا۔

جاپان کے علاوہ ایشیا پیسیفک خطے کے حصص پر مشتمل ایم ایس سی آئی کے وسیع ترین انڈیکس میں بدھ کو 0.8 فیصد اضافہ ہوا جبکہ منگل کو اس میں 3.6 فیصد کی کمی ریکارڈ کی گئی تھی۔ تاہم یہ انڈیکس اب بھی جولائی کے مہینے میں مجموعی طور پر 6.6 فیصد کمی کی جانب گامزن ہے۔ ادھر جاپان کے نکی انڈیکس میں 1 فیصد اضافہ ہوا لیکن اس کے باوجود جولائی کے دوران تقریباً 10 فیصد ماہانہ کمی کا امکان برقرار ہے۔

یہ انٹرا ڈے اپڈیٹ ہے