ڈالر کے مقابلے میں روپیہ مزید مضبوط

انٹربینک مارکیٹ میں منگل کو بھی ڈالر کے مقابلے روپے کی قدر میں بہتری کا سلسلہ جاری رہا۔

اسٹیٹ بینک کے مطابق کاروبار کے اختتام پر ڈالر کے مقابلے میں روپیہ ایک پیسے کی بہتری سے 277.85 روپے پر بند ہوا۔

یاد رہے کہ پیر کو مقامی کرنسی 277.86 روپے پر بند ہوئی تھی۔

مزید برآں ڈالر منگل کو ایک ماہ کی بلند ترین سطح کے قریب مستحکم رہا کیونکہ سرمایہ کار فیڈرل ریزرو کے آئندہ اجلاس میں شرحِ سود میں اضافے کے محدود مگر برقرار امکان کا جائزہ لے رہے تھے،اگرچہ تیل کی قیمتوں میں کمی نے مہنگائی سے متعلق بعض خدشات کو کم کردیا ہے۔

ڈالر انڈیکس 0.03 فیصد بڑھ کر 101.55 پر پہنچ گیا جب کہ یورو 0.01 فیصد کمی کے ساتھ 1.1366 ڈالر پر آگیا۔

جاپانی ین کے مقابلے میں امریکی ڈالر 0.05 فیصد اضافے کے ساتھ 163.82 ین پر پہنچ گیا جب کہ برطانوی پاؤنڈ 0.02 فیصد کمی کے ساتھ 1.3284 ڈالر پر آگیا۔

دریں اثنا منگل کو تیل کی قیمتوں میں ایک فیصد کمی ریکارڈ کی گئی۔

برینٹ خام تیل کے فیوچر 0.54 ڈالر یا 0.6 فیصد کمی کے بعد 87.82 ڈالر فی بیرل پر آگئے۔

اسی طرح امریکی ویسٹ ٹیکساس انٹرمیڈیٹ خام تیل کی قیمت 0.66 ڈالر یا 0.8 فیصد کمی کے بعد 81.95 ڈالر فی بیرل رہی۔

تجارتی سیشن کے آغاز میں دونوں معاہدے ایک فیصد تک گرگئے تھے جو ایک ہفتے سے زائد عرصے کی کم ترین سطح تھی۔