ڈالر کے مقابلے میں روپیہ مزید مضبوط ہوگیا

انٹربینک مارکیٹ میں بدھ کو بھی ڈالر کے مقابلے روپیہ اپنی بہتری کا سلسلہ برقرار رکھنے میں کامیاب رہا۔

کاروبار کے اختتام پر ڈالر کے مقابلے میں روپیہ ایک پیسے کی بہتری سے 277.91 روپے پر بند ہوا۔

یاد رہے کہ منگل کو منگل کو مقامی کرنسی امریکی ڈالر کے مقابلے میں 277.92 روپے پر بند ہوئی تھی۔

دریں اثنا بدھ کو بڑھتی ہوئی تیل کی قیمتوں اور امریکی ٹریژری ییلڈ نے ڈالر کو مزید مضبوط کردیا جس کی وجہ سے ین تقریباً چار دہائیوں کی کم ترین سطح کے قریب منڈلاتا رہا اور تاجر ممکنہ جاپانی مداخلت کے حوالے سے شدید تشویش میں مبتلا رہے۔

گزشتہ شب امریکی ڈالر نے بیشتر بڑی کرنسیوں کے مقابلے میں نمایاں مضبوطی حاصل کی جس کے باعث یورو عارضی طور پر 1.14 ڈالر سے بھی نیچے چلا گیا۔ بعد ازاں ڈالر اپنی مضبوط پوزیشن برقرار رکھنے میں کامیاب رہا جبکہ امریکی افواج نے ایران پر مسلسل گیارہویں رات بھی حملے جاری رکھے۔

کامن ویلتھ بینک آف آسٹریلیا کی کرنسی حکمتِ عملی کی ماہر سمارا حمود نے کہا کہ اگر مشرقِ وسطیٰ میں کشیدگی برقرار رہی تو محفوظ سرمایہ کاری کی حیثیت اور تیل کی قیمتوں سے اس کے عمومی مثبت تعلق کے باعث امریکی ڈالر کو مزید تقویت ملنے کا امکان ہے۔

یورو کی قدر آخری اطلاعات تک 1.1401 ڈالر رہی جبکہ آسٹریلوی ڈالر 70 امریکی سینٹ کی سطح کے قریب برقرار رہا اور نیوزی لینڈ ڈالر 0.5825 ڈالر کی اپنی 200 روزہ موونگ ایوریج سے کچھ اوپر ٹریڈ کرتا رہا۔

دوسری جانب برطانوی پاؤنڈ بھی دباؤ کا شکار رہا اور 200 روزہ موونگ ایوریج سے نیچے پھسل کر 1.3385 ڈالر تک آ گیا کیونکہ سرمایہ کار اس بات کا جائزہ لے رہے تھے کہ برطانیہ کے نئے وزیرِ خزانہ جان ہیلی حکومتی اخراجات کے لیے مالی وسائل کیسے فراہم کریں گے۔