پاکستان میں ڈیجیٹل ادائیگیوں کے مستقبل میں پے پاک کلیدی کردار ادا کرے گا، گورنر اسٹیٹ بینک

اسٹیٹ بینک آف پاکستان (ایس بی پی) کے گورنر جمیل احمد نے بدھ کو کہا کہ پے پاک سے توقع ہے کہ وہ پاکستان میں ڈیجیٹل ادائیگیوں کے مستقبل میں مرکزی کردار ادا کرے گا، کیونکہ مرکزی بینک زیادہ جامع، مضبوط اور نقدی پر کم انحصار کرنے والا مالیاتی نظام تشکیل دینے کے لیے کوشاں ہے۔

ایس بی پی کے جاری کردہ بیان کے مطابق، ایچ بی ایل کی جانب سے یونین پے انٹرنیشنل اور پے پاک کے اشتراک سے مشترکہ برانڈڈ ڈیبٹ کارڈ کی تقریبِ رونمائی سے خطاب کرتے ہوئے گورنر نے کہا کہ پاکستان کے مقامی ادائیگی نظام کو ملک کی ڈیجیٹل معیشت کا بنیادی ستون رہنا چاہیے اور پے پاک کو مقامی ڈیبٹ کارڈز کے اجرا کے لیے ترجیحی پلیٹ فارم بنایا جانا چاہیے۔

انہوں نے کہا کہ مشترکہ برانڈڈ کارڈز مقامی ادائیگی نظام کی تکمیل کریں گے اور بین الاقوامی ادائیگیوں کی سہولت بھی فراہم کریں گے، جس سے صارفین پاکستان کے اندر اور بیرونِ ملک باآسانی لین دین کر سکیں گے۔

گورنر کے مطابق یہ اقدام ایس بی پی وژن 2028 اور وزیراعظم کے کیش لیس پاکستان اقدام سے ہم آہنگ ہے، جس کا مقصد زیادہ جامع، ڈیجیٹل اور مضبوط مالیاتی نظام قائم کرنا ہے۔

ڈیجیٹل مالیاتی شعبے میں پیش رفت کا ذکر کرتے ہوئے جمیل احمد نے بتایا کہ گزشتہ ایک سال کے دوران ریٹیل ڈیجیٹل لین دین کا حجم تقریباً 6.9 ارب سے بڑھ کر 12 ارب تک پہنچ گیا، جبکہ ڈیجیٹل ادائیگیاں قبول کرنے والے فعال تاجروں کی تعداد 5 لاکھ سے بڑھ کر 20 لاکھ سے تجاوز کر گئی۔

انہوں نے مزید بتایا کہ موبائل بینکنگ ایپلی کیشنز استعمال کرنے والوں کی تعداد تقریباً 13 کروڑ 70 لاکھ تک پہنچ چکی ہے، جبکہ ڈیجیٹل ذرائع سے وصول ہونے والی ترسیلاتِ زر کا تناسب 80 فیصد سے بڑھ کر 92 فیصد ہو گیا ہے، جو عوام کے ڈیجیٹل مالیاتی خدمات پر بڑھتے ہوئے اعتماد کا مظہر ہے۔

مسلسل جدت کی ضرورت پر زور دیتے ہوئے گورنر اسٹیٹ بینک نے کہا کہ پے پاک کو صارفین کی بدلتی ضروریات اور ابھرتی ہوئی ٹیکنالوجیز سے ہم آہنگ ہونا ہوگا۔

انہوں نے بینکوں، ڈیجیٹل بینکوں، ادائیگی خدمات فراہم کرنے والے اداروں، فن ٹیک کمپنیوں اور تاجروں پر زور دیا کہ وہ ڈیجیٹل ادائیگیوں کے فروغ، سائبر سکیورٹی کے استحکام اور صارفین میں آگاہی بڑھانے کے لیے باہمی تعاون کریں۔

جمیل احمد نے ایچ بی ایل، یونین پے انٹرنیشنل، پے پاک اور ون لنک کو مشترکہ برانڈڈ ڈیبٹ کارڈ کے اجرا پر مبارکباد دیتے ہوئے کہا کہ یہ شراکت داری اس بات کی مثال ہے کہ مقامی اور بین الاقوامی ادائیگی نیٹ ورکس کے درمیان تعاون کے ذریعے جدت کو فروغ، مالیاتی شمولیت میں اضافہ اور پاکستان کی ڈیجیٹل اور کم نقدی پر مبنی معیشت کی جانب منتقلی کو تیز کیا جا سکتا ہے۔