قطر نے تمام سمندری سرگرمیاں فوری طور پر بحال کرنے کا اعلان کر دیا

قطر نے اتوار کے روز سمندری سرگرمیاں فوری طور پر بحال کرنے کا اعلان کر دیا۔

قطری وزارتِ ٹرانسپورٹ نے سماجی رابطے کی ویب سائٹ ایکس پر جاری اپنے بیان میں کہا کہ سمندری سرگرمیاں فوری طور پر دوبارہ شروع کی جا رہی ہیں۔

یہ فیصلہ 29 جون کو جاری کیے گئے اس مشاورتی نوٹس کو واپس لینے کے مترادف ہے، جس میں آئندہ اطلاع تک کشتی رانی اور ماہی گیری کی کشتیوں کی سرگرمیاں عارضی طور پر معطل کرنے کی ہدایت کی گئی تھی، تاہم تجارتی جہاز رانی کو اس پابندی سے مستثنیٰ رکھا گیا تھا۔

وزارت نے تمام بحری جہازوں کے آپریٹرز اور سمندری سرگرمیوں سے وابستہ افراد پر زور دیا ہے کہ وہ نافذ العمل سمندری قوانین اور ہدایات پر سختی سے عمل کریں تاکہ تمام بحری سفر کے دوران اعلیٰ ترین سطح کی حفاظت اور سلامتی کو یقینی بنایا جا سکے۔

قطری حکام نے 29 جون کو عائد کی گئی عارضی پابندی کی کوئی باضابطہ وجہ بیان نہیں کی تھی، تاہم یہ اقدام اس اعلان کے ایک روز بعد سامنے آیا تھا جس میں قطر نے کہا تھا کہ اس کا ایک شہری خطے میں جاری فوجی کارروائیوں کے دوران شیل کے ٹکڑوں سے زخمی ہونے کے بعد جاں بحق ہو گیا۔ یہ واقعہ اس وقت پیش آیا جب مذکورہ شہری کی کشتی لاپتا ہو گئی تھی۔