مالی سال 26-2025 کے دوران ریکارڈ 43,559 نئی کمپنیاں رجسٹرڈ

مالی سال 26-2025 کے دوران پاکستان میں ریکارڈ 43,559 نئی کمپنیاں رجسٹرڈ ہوئیں۔

سیکیورٹیز اینڈ ایکسچینج کمیشن آف پاکستان (ایس ای سی پی) کے مطابق اس اضافے کے بعد ملک میں رجسٹرڈ کمپنیوں کی مجموعی تعداد 3 لاکھ ایک ہزار 615 ہو گئی ہے۔

ایس ای سی پی نے بتایا کہ گزشتہ مالی سال کے مقابلے میں کمپنیوں کے اندراج میں 24 فیصد اضافہ ہوا جو پاکستان کے کارپوریٹ سیکٹر میں مضبوط نمو کی عکاسی کرتا ہے۔

صرف جون میں 4,323 نئی کمپنیاں رجسٹرڈ ہوئیں جو کسی بھی ایک مہینے میں ریکارڈ کی گئی اب تک کی سب سے زیادہ تعداد ہے۔

مالی سال کے دوران پبلک سیکٹر کی کمپنیوں کے اندراج میں بھی 25 فیصد اضافہ دیکھنے میں آیا۔

صوبائی لحاظ سے بات کی جائے تو پنجاب 22,364 نئی کمپنیوں کی رجسٹریشن کے ساتھ سرفہرست رہا جس کے بعد سندھ میں 6,691 اور خیبر پختونخوا میں 3,820 نئی کمپنیاں رجسٹرڈ ہوئیں۔

دریں اثنا گلگت بلتستان نے علاقائی سطح پر سب سے زیادہ ترقی ریکارڈ کی جہاں 1,585 کمپنیاں رجسٹرڈ ہوئیں جو کہ 65 فیصد اضافے کو ظاہر کرتا ہے۔

بلوچستان میں 759 نئی کمپنیاں رجسٹرڈ ہوئیں جو گزشتہ سال کے مقابلے میں 36 فیصد زیادہ ہیں۔

نئی رجسٹرڈ ہونے والی کمپنیوں میں سب سے بڑا حصہ ٹریڈنگ (تجارت) کے شعبے کا رہا جس میں کل نئی شامل ہونے والی کمپنیوں کا 41 فیصد حصہ شامل ہے۔

دریں اثنا مالی سال 26-2025 کے دوران غیر ملکی سرمایہ کاروں نے 1,014 کمپنیاں رجسٹرڈ کروائیں جن کا مجموعی پیڈ اپ کیپٹل (اداشدہ سرمایہ) 2.5 ارب روپے ہے۔

ایس ای سی پی کے مطابق غیر ملکی سرمایہ کار سب سے زیادہ ٹریڈنگ، کان کنی اور انفارمیشن ٹیکنالوجی کے شعبوں میں متحرک رہے۔ سب سے زیادہ کمپنیاں چین کے سرمایہ کاروں نے رجسٹرڈ کروائیں۔

ایس ای سی پی نے مزید بتایا کہ امریکہ، برطانیہ، جرمنی، کینیڈا اور اسپین کے سرمایہ کاروں نے بھی پاکستان میں اپنی کمپنیاں قائم کیں۔