ڈالر کے مقابلے میں روپے کی قدر میں معمولی اضافہ

انٹربینک مارکیٹ میں جمعرات کو ڈالر کے مقابلے میں روپے کی قیمت میں معمولی اضافہ دیکھا گیا۔

اسٹیٹ بینک کے مطابق کاروبار کے اختتام پر مقامی کرنسی ڈالر کے مقابلے میں 1 پیسے کے اضافے کے ساتھ 278.15 پر بند ہوئی۔

منگل کو روپیہ 278.16 پر بند ہوا تھا

دوسری جانب عالمی مارکیٹ میں جمعرات کو امریکی ڈالر کی قیمت مستحکم رہی کیونکہ سرمایہ کار امریکہ کے اہم نان فارم پے رولز (ملازمتوں کے) ڈیٹا کا انتظار کر رہے ہیں۔ اس دوران گرین بیک (ڈالر) کے مقابلے میں جاپانی ین کی قدر 40 سال کی کم ترین سطح پر گرنے اور امریکی تعطیل سے قبل مارکیٹ میں سست کاروباری سرگرمیوں نے ٹریڈرز کو مانیٹری مداخلت کے حوالے سے ہائی الرٹ رکھا۔ ڈالر انڈیکس، جو ین اور یورو سمیت چھ بڑی عالمی کرنسیوں کے مقابلے میں ڈالر کی قدر کی پیمائش کرتا ہے، 0.02 فیصد کمی کے ساتھ 101.38 پر آ گیا۔

رائٹرز کے سروے میں ماہرینِ معاشیات کے لگائے گئے اوسط تخمینے کے مطابق جمعرات کو سامنے آنے والے ڈیٹا سے توقع ہے کہ جون کے مہینے میں امریکی آجروں نے 110,000 ملازمتوں کا اضافہ کیا ہے، جبکہ بے روزگاری کی شرح 4.3 فیصد پر مستحکم رہی ہے۔

مزید برآں عالمی مارکیٹ میں خام تیل کی قیمتوں میں جمعرات کو لگ بھگ 1 فیصد کی کمی دیکھی گئی، جس کے بعد مسلسل تیسرے دن بھی قیمتیں گراوٹ کا شکار رہیں۔ برینٹ کروڈ کے فیوچرز 79 سینٹ یا 1.1 فیصد گر کر 70.78 ڈالر فی بیرل پر آ گئے، جبکہ امریکی ویسٹ ٹیکساس انٹرمیڈیٹ (ڈبلیوٹی آئی) خام تیل کی قیمت 84 سینٹ یا 1.2 فیصد کمی کے ساتھ 67.74 ڈالر فی بیرل ہو گئی۔ گزشتہ کاروباری سیشن میں بھی دونوں بینچ مارکس میں 1 فیصد سے زیادہ کی کمی ہوئی تھی۔

ہائی ٹونگ فیوچرز نے اپنی ایک رپورٹ میں بتایا کہ چونکہ بحری تجارتی راستے (اسٹریٹ) کھلے ہیں اور خام تیل کی سپلائی جاری ہے، اس لیے مارکیٹ میں تیل کی ضرورت سے زیادہ فراہمی کی توقعات بڑھ رہی ہیں اور مارکیٹ شیئر حاصل کرنے کے مقابلے کے باعث قیمتیں نیچے آ رہی ہیں۔