چوالنسکا میچ پوائنٹ پر گرنے کے بعد ومبلڈن سے باہر ہوگئیں

فرنچ اوپن کی رنر اپ مایا چوالنسکا پیر کو ومبلڈن کے پہلے ہی راؤنڈ میں حیران کن طور پر باہر ہوگئیں، جب انہیں تھائی لینڈ کی کوالیفائر مانانچایا ساوانگکائیو نے 2-6، 7-5 اور 6-2 سے شکست دے دی۔ میچ کے فیصلہ کن لمحے میں میچ پوائنٹ پر گرنے کے باعث چوالنسکا کے دائیں ٹخنے میں چوٹ لگ گئی، جس کے بعد وہ اپنی بہترین کارکردگی برقرار نہ رکھ سکیں۔

24 سالہ پولش کھلاڑی چوالنسکا کو رولانڈ گیروس میں شاندار کارکردگی کے صلے میں ومبلڈن کا وائلڈ کارڈ دیا گیا تھا، جبکہ اسی عمدہ فارم کی بدولت انہیں آل انگلینڈ کلب میں 20ویں سیڈ بھی قرار دیا گیا۔

چوالنسکا نے پہلا سیٹ باآسانی جیت لیا تھا اور دوسرے سیٹ میں 5-2 اور 40-30 کی برتری کے ساتھ میچ جیتنے سے صرف ایک پوائنٹ دور تھیں، لیکن اسی موقع پر وہ بیس لائن کے قریب پھسل کر بری طرح گر پڑیں، جس سے ان کے دائیں ٹخنے میں چوٹ آگئی۔

انہوں نے دوسرے سیٹ میں کھیل جاری رکھا، تاہم چوٹ کے باعث آزادانہ انداز میں حرکت نہ کر سکیں اور ساوانگکائیو نے دوسرا سیٹ جیت کر مقابلہ ایک، ایک سیٹ سے برابر کردیا۔ فیصلہ کن سیٹ میں بھی چوالنسکا نے 2-0 کی برتری حاصل کی، لیکن اسے برقرار نہ رکھ سکیں اور ان کی مزاحمت دم توڑ گئی۔

دنیا میں 164ویں نمبر پر موجود مانانچایا ساوانگکائیو نے دباؤ میں بھی اعصاب مضبوط رکھے، چوالنسکا کی بھرپور مزاحمت کا ڈٹ کر مقابلہ کیا اور فتح اپنے نام کرتے ہوئے گرینڈ سلیم کے مین ڈرا میں اپنے کیریئر کی پہلی کامیابی حاصل کرلی۔