جے ڈی وینس کی امریکا ایران مذاکرات میں پاکستان کے کردار کی تعریف
- ہم پاکستان سے محبت کرتے ہیں اور اس کی کوششوں پر شکر گزار ہیں، امریکی نائب صدر
امریکی نائب صدر جے ڈی وینس نے امریکا اور ایران کے درمیان جاری امن کوششوں میں سہولت کاری کے لیے پاکستان کے کردار کو سراہتے ہوئے کہا ہے کہ واشنگٹن پاکستان کی سفارتی کوششوں کو قدر کی نگاہ سے دیکھتا ہے۔
سوئٹزرلینڈ کے شہر بورگن اسٹاک میں امریکا ایران تکنیکی سطح کے مذاکرات کے موقع پر پاکستانی فوج کے سربراہ فیلڈ مارشل عاصم منیر اور وزیرِ اعظم شہباز شریف سے ملاقات کے دوران جے ڈی وینس نے کہا کہ صدر ڈونلڈ ٹرمپ اور امریکی انتظامیہ پاکستان سے محبت کرتی ہے اور اس کے کردار کی قدر کرتی ہے۔
انہوں نے کہا کہ ہم پاکستان سے محبت کرتے ہیں اور اس کی کوششوں پر شکر گزار ہیں۔ملاقات میں امریکی خصوصی ایلچی اسٹیو وٹکوف اور سابق مشیر جیرڈ کشنر بھی شریک تھے، جس سے ظاہر ہوتا ہے کہ واشنگٹن اس عمل میں اعلیٰ سطحی دلچسپی رکھتا ہے۔
یہ ملاقات امریکا اور ایران کے درمیان جاری تکنیکی مذاکرات کے موقع پر ہوئی، جن میں پاکستان اور قطر ثالثی کے اہم کردار ادا کر رہے ہیں۔ دونوں فریقین کے درمیان رابطوں اور اعتماد سازی کے اقدامات پر بات چیت جاری ہے۔
بعد ازاں وزیرِ اعظم شہباز شریف نے بھی اجلاس سے خطاب کرتے ہوئے امریکی صدر ڈونلڈ ٹرمپ کی قیادت کو بصیرت افروز قرار دیا اور کہا کہ یہ مذاکرات عالمی امن کے لیے ایک اہم موقع ہیں۔ انہوں نے فیلڈ مارشل عاصم منیر کے کردار کو بھی سراہا۔
پاکستانی حکام کے مطابق یہ مذاکرات 17 جون 2026 کو طے پانے والے اسلام آباد مفاہمتی یادداشت کے تحت ہو رہے ہیں، جس کا مقصد امریکا اور ایران کے درمیان کشیدگی کم کرنا اور عملی تعاون کو فروغ دینا ہے۔
ماہرین کے مطابق پاکستان کا ثالثی کردار خطے میں سفارتی توازن اور امن کی کوششوں کے لیے اہم پیش رفت قرار دیا جا رہا ہے، جبکہ مذاکرات کو علاقائی استحکام کے لیے ایک اہم موقع سمجھا جا رہا ہے۔
Comments